काठमाडौं । कुमारी बैंक लिमिटेडको विशेष साधारण सभा सोमबार सम्पन्न भएको छ । बैंक सञ्चालक समितिका अध्यक्ष आमिर प्रताप राणाको अध्यक्षतामा भएको साधारण सभामा साविकको देवः विकास बैंकको प्राप्तिको प्रस्ताव पारित भएको छ ।
कुमारी बैंकका सञ्चालक समितिका सदस्यहरू, प्रमुख कार्यकारी अधिकृत लगायत उच्च व्यवस्थापन अधिकारीहरुका माझ एक समारोह बीच साविकको देवः विकास बैंक लिमिटेडको प्रारम्भिक सहमति तथा अन्तिम सम्झौता पत्रहरुको अनुमोदन सम्पन्न भएको छ ।
उक्त प्राप्ति पश्चात बैंकको चुक्ता पूँजी १२ अर्ब ५० करोडभन्दा बढी हुनेछ। साथै, निक्षेप १२० अर्ब तथा कर्जा लगानी १०५ अर्ब र शाखा सञ्जाल भने २०९ हुनेछ ।
यस विशेष साधारण सभामार्फत प्राप्ति पश्चात् कुमारी बैंकको प्रति १ कित्ता शेयर बराबर देवः विकास बैंकको ०.८६ कित्ता शेयर अनुपातमा शेयर मूल्य कायम हुने गरी स्वाप रेसियो स्वीकृत भएको छ ।
यस कोभिड–१९ का कारण पर्न सक्ने सम्भावित असर एवं लकडाउनलाई मध्यनजर गर्दै सम्पूर्ण सुरक्षात्मक उपायहरू सबै अवलम्बन गरी बैंकले नवीन शैली प्रयोगमा ल्याउँदै डिजिटल प्लाटफर्म जुम मार्फत शेयरधनीहरुको मन्तव्य, सुझाव लिएको थियो ।
वि.सं.२०७७ जेठ १९ सोमवार १७:१० मा प्रकाशित