विराटनगर । भोलिदेखि विराटनगरमा बजार मध्याह्न १२ बजेसम्म खुल्ने भएको छ । विराटनगर महानगरपालिकाभित्रका ब्युटिपार्लर, सैलुन र होटलबाहेकका अन्य सबै पसल तथा व्यवसाय खोल्न दिने निर्णय भएको छ ।
व्यवसायीले स्वास्थ्य सुरक्षा अपनाएर बजार तथा पसल खोल्न दिनुपर्ने माग गर्दै आएका थिए । विराटनगर महानगर क्षेत्रमा बिहानदेखि दिउँसो १२ बजेसम्म पसल खोल्न पाइने बुधबार निर्णय भएको हो ।
जिल्ला प्रशासन कार्यालय मोरङमा कोभिड क्राइसिस मेनेजमेन्ट कमिटीको बैठकले सामाजिक दूरी कायम गर्दै स्वास्थ्य सतर्कता अपनाएर बजार खोलाउने निर्णय गरेको विराटनगर महानगरपालिकाका मेयर भीम पराजुलीले जानकारी दिएका छन् ।
बजार क्षेत्रमा सामाजिक दूरी कायम राखेर सुरक्षितरूपमा व्यापार र व्यवसाय गरे नगरेको अनुगमनसमेत हुने पराजुलीले बताए । उनले भने, “यसको प्रत्यक्ष अनुगमन विराटनगर महानगरपालिका र जिल्ला प्रशासन कार्यालय मोरङले गर्नेछन् ।” यो निर्णय भएसँगै महानगर क्षेत्रमा बजार खुल्ने निश्चित भएको छ ।
थोरै समय खोल्दा भीड बढी भएर सामाजिक दूरी कायम गर्न समस्या पर्ने भए पनि व्यापारी तथा व्यवसायीले यो निर्णयको स्वागत गरेका छन् ।
वि.सं.२०७७ जेठ २१ बुधवार १८:१५ मा प्रकाशित