धरान । धरानमा लकडाउनको मोडालिटी परिवर्तन गरिएको छ । लकडाउनको मोडालिटी परिवर्तन गर्नुपर्ने माग बढ्दै गएपछि धरान उपमहानगरपालिकाले समय तालिका बनाएर पसल व्यवसाय खोल्ने निर्णय गरेको हो ।
केही दिनअघि सुनसरी उद्योग वाणिज्य संघमा भएको धरान उपमहानगरपालिका र व्यवसायीको बैठकले लकडाउनको विषयमा अध्ययन गर्न समिति गठन गरेको थियो ।
पूर्व नगर प्रमुख मनोज कुमार मेन्याङबोको संयोजकत्वमा गठित समितिले साँझ ६ बजेसम्म बजार खोल्न प्रस्ताव पेश गरे पनि धरानको सुरक्षा समितिको बैठकले दिउँसो २ बजेसम्म खोल्न दिने निर्णय गरेको छ ।
शनिवार बिहान धरान उपमहानगरपालिकामा प्रमुख जिल्ला अधिकारी, बीपी प्रतिष्ठानका चिकित्सक र प्रदेश तथा संघीय सांसदहरूबीच भएको बैठकले नगरपालिकालाई उद्योग वाणिज्य संघसँग बैठक बसी निर्णय गर्न भनेको थियो । सोहीअनुसार बसेको बैठकले दुई सिफ्टमा बजार खुलाउने निर्णय गरेको छ ।
यससँगै धरानमा तरकारी र खाद्यान्न पसल बिहान ६ देखि १० बजेसम्म र अन्य पसलहरू बिहान ९ देखि दिउँसो २ बजेसम्म खोल्न पाइनेछ । तर, सामाजिक दूरी कायम नहुने ब्यूटीपार्लर, सैलुन, होटलहरू भने खोल्न पाइनेछैन । खुलेका पसलहरूले अनिवार्य रूपमा सुरक्षा मापदण्ड अपनाउनु पर्ने र सामाजिक भौतिक दूरी कायम गर्नुपर्ने संघका अध्यक्ष गिरिधारी सापकोटाले बताए ।
यस्तै ब्यूटीपार्लर तथा सैलुन, जिमहल, सिनेमाहल, होटल तथा लज, रेष्टुरेन्ट एण्ड बार, डान्स बार, ठेलामा राखी विक्री गरिने फाष्टफुड व्यवसाय अर्काे निर्णय नहुन्जेलसम्मका लागि बन्द रहने कार्यसमितिका सदस्य विष्णु बरालले जानकारी दिए ।
बैठकले बैंक तथा वित्तीय संस्थाहरू प्रत्येक दिन खोल्ने निर्णय पनि गरेको छ भने टेम्पो, सफारी लगायत सवारीसाधन सञ्चालन गर्न पाइनेछैन । आजको अभियान दैनिकमा समाचार छ ।
वि.सं.२०७७ जेठ २५ आइतवार ०९:१५ मा प्रकाशित