काठमाडौं । नेपाल सरकारका पूर्वसचिव अर्जुन कार्कीकी ४९ वर्षीया श्रीतमी मुना कार्कीको हत्या सम्बन्धमा साढे चार महिनापछि प्रहरीले अन्तिम निष्कर्ष निकाल्दै असुन्धानलाई बन्द गरेको छ ।
ललितपुरको सानेपास्थित आफ्नै निवासमा २०७६ माघ २७ गते बिहान करिब साढे ११ बजेर पूर्वसचिव कार्कीकी श्रीमती मुना अचेत अवस्थामा आफनै भेटिएकी थिइन् ।
त्यसपछि उनलाई सानेपास्थित स्टार अस्पतालमा लगिए पनि चिकित्सकले मृत घोषित गरेको थियो । साथै कार्कीको घरमा काम गर्ने विजय चौधरी पनि झुण्डिएको अवस्थामा मृत फेला परेका थिए ।
साढे चार महिना लगाएर महानगरीय प्रहरी परिसर ललितपुरले गरेको अनुसन्धानले मुनाको हत्यामा चौधरीको संलग्नता देखिएको निष्कर्ष निकाल्दै अनुसन्धान बन्द गरेको छ ।
प्रहरीको अनुसन्धानले मुनाको हत्यामा चौधरी बाहेक तेस्रो पक्ष संलग्न भएको नदेखिएको निष्कर्ष निकालेको हो । प्रहरीले मुना र चौधरी दुवैको मोबाइललाई फरेन्सिक ल्याबमार्फत अनुसन्धान गर्दा पनि तेस्रो पक्षमाथि शंका गर्दै अनुसन्धान बढाउनु पर्ने आवश्यकता नदेखेको हो ।
भिडियोलगायत अन्य प्रमाण हेर्दा मुनाको हत्या चौधरीले गरेको देखिएको र पोस्टमार्टमा रिपोर्टमा चौधरीले आफ्नो घाँटीमा पासो लगाएको देखिएको प्रहरीको भनाइ छ । तर, के कारणले चौधरीले मुनाको हत्या गरेको भन्नेमा प्रहरीले कुनै निष्कर्ष निकाल्न सकेको छैन ।
मुनाको हत्याको कारण चौधरीले आत्महत्या गरेसँगै रहस्यको गर्भमै मरेको प्रहरीको निष्कर्ष छ । अर्जुन र मुनासहित उनका परिवारले निकै माया चौधरीलाई गर्ने गरेको र चौधरीले पनि उनीहरुलाई पनि उत्तिकै माया गर्ने गरेको अनुसन्धान देखिएको प्रहरी स्रोतको भनाइ छ । तर, सो घटनाको कारण भने प्रहरी अनुसन्धानमा पनि खुल्न सकेन ।
वि.सं.२०७७ असार १० बुधवार १५:४६ मा प्रकाशित