बाजुरा । गौमूल गाउँपालिकाले जनस्वास्थ्यमा असर पारेको भन्दै चाउचाउ बिक्री बितरण बन्द गर्ने निर्णय गरेको छ । गाउँपालिकाको बुधबार सम्पन्न सातौँ गाउँसभाले चाउचाउ ६ वटै वडामा पूर्ण रुपमा बिक्री बन्द गर्ने निर्णय गरेको हो ।
गाउँपालिका केन्द्र रहेको घटमुना बजारबाहेक सबै वडामा चाउचाउसहितका मसलादार उत्पादन सामग्री बन्द गर्ने निर्णय गरिएको गाउँपालिका उपाध्यक्ष सीता थापाले बताउनुभयो ।
गाउँपालिकाले आगामी आर्थिक वर्षका लागि ३२ करोड २९ लाख रुपैयाँ बराबरको बजेट प्रस्तुत गरेको छ । सातौँ गाउँसभामा उपाध्यक्ष थापाले समानीकरण, संघीय र प्रदेश सरकारको अनुदान, सशर्त र राजस्व बाँडफाँट लगायत शीर्षक समावेश गरिएको ३२ करोड २८ लाख, ७६ हजार बराबरको बजेट प्रस्तुत गर्नुभयो ।
गाउँपालिकाले नीति तथा कार्यक्रम र बजेट शीर्षकमा पनि कृषि उत्पादन, आयआर्जन, युवा रोजगारका विषयलाई प्राथमिकतामा राखेको छ । घटमुनामा १५ शय्याको अस्पताल निर्माण गर्ने गरी योजना अघि सारिएको छ ।
वि.सं.२०७७ असार ११ बिहीवार १३:४५ मा प्रकाशित