स्याङ्जा । जिल्ला प्रहरी कार्यालय प्रमुखसहित २१ जना प्रहरीमा कोरोना संक्रमण देखिएपछि जिल्लालाई १० दिनका लागि सिल गरिएको छ । जिल्ला व्यवस्थापन समितिको मंगलबार बसेको बैठकले १० दिनका लागि जिल्ला सिल गरेको हो ।
कोरोना संक्रमण बढ्दै गएकोले समुदायमा फैलिनबाट रोक्न जिल्ला सिल गर्ने निर्णय गरिएको प्रमुख जिल्ला अधिकारी गांगाबहादुर क्षेत्रीले जानकारी दिनुभयो ।
आइसोलेसन र क्वारेन्टिनको सुरक्षामा खटिएका सुरक्षाकर्मी सँगै प्रहरी कार्यालयमा कार्यरत प्रहरीमा समेत संक्रमण देखिएकोले कन्टेयाक ट्रेसिङको काम शुरु गरिएको प्रमुख जिल्ला अधिकारी क्षेत्रीले बताउनुभयो ।
संक्रमणबाट बच्न अति आवश्यक काम बाहेक घर बाहिर ननिस्किन आग्रह गर्दै प्रजिअ क्षेत्रीले जिल्लाको सुरक्षा व्यवस्था थप कडा पारिएको बताउनुभयो । उहाँले कसैले नियम अवज्ञा गरेमा कारबाही गर्ने समेत जानकारी दिनुभयो । बिरामीको स्वास्थ्य उपचार, एम्बुलेन्स र अत्यावश्यक बाहेकका सबै सेवा बन्द गरिएको जिल्ला प्रशासन कार्यालयले जनाएको छ ।
जिल्ला स्वास्थ्य कार्यालय स्याङ्जाका प्रमुख यामप्रसाद शर्माले जिल्ला सदरमुकाममा रहेका सरकारी कार्यालय प्रहरीको सम्पर्कमा आएका व्यावसायी र केही मज्दुर गरी २ सय १५ जनाको स्वाब संकलन गर्ने तयारी भइरहेको जानकारी दिनुभयो । संक्रमण भित्रभित्रै फैलिएकाले कन्टेयाक ट्रेसिङ गरेर स्वाब संकलनमा लागिएको स्वास्थ्य कार्यालयका प्रमुख शर्माले बताउनुभयो ।
गण्डकी प्रदेशको पोखरामा गरिएको परीक्षणमा सोमबार जिल्ला प्रहरी कार्यालयका प्रमुख एसपी विमलराज कँडेलसहित १८ जना र साउन ६ गते ३ जना प्रहरीमा कोरोना संक्रमण देखिएको थियो ।
संक्रमण देखिएपछि जिल्ला प्रहरी प्रमुख एसपी विमलराज कँडेल जिल्ला प्रहरी कार्यालयको क्वाटरमा आइसोलेसनमा रहेको र अन्य प्रहरीहरुलाई कालिका सामुदायीक अस्पताल हेलु र करेन्डाँडामा रहेको स्वास्थ्य केन्द्रको आइसोलेसनमा राखिएको प्रहरी नायव उपरीक्षक राजेन्द्र प्रसाद अधिकारीले जानकारी दिनुभयो ।
सेल्फ आइसोलेसनमा बस्नुभएका एसपी कँडेलले जनताको सेवामा खट्दा संक्रमण भएको बताउनुभयो । प्रहरी प्रमुख एसपी कँडेलले भन्नुभयो, “जनताको सेवाको लागि फ्रन्ट लाइनमा रहेर काम गर्नुपर्ने, कतिबेता संक्रमित भइयो पत्तै भएन । कार्यालयमा सेवा लिन आउनेहरुबाट भयो की समाजमा शान्ति सुरक्षा कायम गर्न खटेको अवस्थामा संक्रमित भइयो, जे भएपनि उच्च मनोबलका साथै कोरोनालाई जित्छु ।”
प्रहरी कार्यालयका प्रमुखसहित ९८ जना प्रहरी र ४ जना थुनुवाको स्वाब संकलन गरेर गरिएको परीक्षणमा सोमबार ४० जनाको रिपोट आएकोमा संक्रमण देखिनेहरुमा १७ जना पुरुष र १ जना महिला प्ररहरी रहेको बताइएको छ । कोरोना संक्रमण देखिनेहरुमा कार्यालय सहयोगी, प्रहरी जवान, असइदेखि कार्यालय प्रमुख समेत रहेका छन् । जिल्ला प्रहरी कार्यालयमा कार्यरत केही प्रहरीमा ज्वरो आउने रुघा समेत लाग्ने भएपछि प्रहरीको स्वाब संकलन गरिएको थियो । जनता समाचारबाट
वि.सं.२०७७ साउन १३ मंगलवार ११:४६ मा प्रकाशित
