बागलुङ । जिल्ला प्रशासन कार्यालय बागलुङले शुक्रबार सूचना जारी गर्दै पास बिनाका सवारी साधनलाई जिल्ला प्रवेशमा रोक लगाएको छ ।
प्रमुख जिल्ला अधिकारी सुरेश न्यौपानेले निकालेको सूचनामा बागलुङ जिल्लाबाट अत्यावश्यक कामको लागि मात्र अन्तर जिल्ला सवारी पास जारी हुने र अन्यत्र जिल्लाबाट बिना पासका सवारी साधनलाई जिल्लामा प्रवेश गर्न रोक लगाइएको उल्लेख छ ।
साथै सवारी पास माग गर्दा गन्तव्य स्थानीय तहको सहमति र हाल बसिरहेको स्थानीय तहको सिफारिस एवं अत्यावश्यक कार्यको प्रमाण सहित कार्यालयमा निवेदन प्राप्त भएपछि मात्र सवारी पास उपलब्ध गराईने उल्लेख गरिएको छ । तर अत्यावश्यक र ढुवानी सेवाको लागि भने पास बनाउन आवश्यक पर्ने छैन ।
देशका विभिन्न स्थानबाट काठमाण्डौ प्रवेश गर्दा ठूलो संख्यामा यात्रुहरुमा कोरोना भाईरस देखिएकाले गृह मन्त्रालयको निर्देशन बमोजिम बागलुङ प्रवेश र सवारी पासमा कडाई गरिएको उल्लेख छ ।
गृह मन्त्रालयले बिहिबारदेखि लागु हुने गरि साँझ ७ बजेदेखि बिहान ७ बजेसम्म काठमाण्डौ उपत्यका प्रवेश नाकामा यात्रुहरुको आवागमन पूर्ण रुपमा बन्द गर्नै निर्णय गरेको छ ।
वि.सं.२०७७ साउन १६ शुक्रवार १४:४८ मा प्रकाशित