डोटी । डोटीको आदर्श गाउँपालिका १ बाँझककनीमा घर भत्किँदा परिवारका चार जनाको मृत्यु भएको छ। अरु पाँच जना घाइते भएका छन् ।
जिल्ला प्रहरी कार्यालयका सूचना अधिकारी प्रहरी नायब उपरीक्षक इन्द्रबहादुर मल्लका अनुसार स्थानीय लोगे विकको घर भत्किँदा उनकी श्रीमती, दुई छोरी र एक छोराको मृत्यु भएको छ। मृत्यु हुनेमा श्रीमती विष्ना, १२ वर्षीय छोरा पारस तथा छोरीहरु ८ वर्षीया सिर्जना र ४ वर्षीया जेनिशा छन् ।
ढुङ्गा र माटोको गाह्रोले बनाएको घर पुरानो भएर भत्किएको मल्लले बताए। उक्त ठाउँमा पानी परिरहेको छ। तीन तले घरको भुईं तलामा चौपाया थिए । घर भत्किँदा दुई वटा गोरु, एउटा गाई र दुई वटा बाख्रा पनि थिचिएका छन्।
घरधनी लोगे, उनकी आमा र एक छोरी घाइते छन्। यस्तै पाहुना आएकी सासु र साला पनि घाइते छन्। उनीहरुको उपचारका लागि सदरमुकाम दिपायल लगिँदैछ ।
घर राति १ बजे भत्किएको हो। वडाध्यक्षले बिहान ३ बजे प्रहरीलाई खबर गरेका थिए। बिहान ५ बजे स्थानीय चौकीबाट प्रहरी घटनास्थल पुगेको मल्लले जानकारी दिए।
वि.सं.२०७७ साउन २७ मंगलवार ०८:२९ मा प्रकाशित