काठमाडौ । कोरना भाइरसको महामारीका बीच नबिल बैंकले ३ अर्ब ५६ करोड रुपैयाँ खुदनाफा गरेको छ । गत आर्थिक वर्षमा कारोना महामारीका कारण नाफा १५.८५ प्रतिशत घटेको छ ।
अघिल्लो आर्थिक वर्षमा बैंकले ४ अर्ब २३ करोड ८८ लाख रुपैयाँ खुदनाफा गरेको थियो । बैंकले सार्वजनिक गरेको गत आर्थिक वर्षको चौथो त्रैमाशिक वित्तीय विवरणमा नाफा कम भएपनि नबिलले सेयरधनीलाई ३ अर्ब ४ करोड रुपैयाँ लाभांश बाँड्न सक्ने देखाएको छ ।
ब्याज, कमिशन र शुल्कबाट गरी नबिलले ९ अर्ब १६ करोड रुपैयाँ आम्दानी गरेको छ । अघिल्लो वर्ष नबिलले ९ अर्ब ३२ करोड ८८ लाख रुपैयाँ गरेको थियो । समीक्षा अवधिमा बैंकले ७४ करोड ४५ लाख रुपैयाँ पुरानो ऋण असुल गरेको छ ।
बैंकको प्रतिसेयर आम्दानी ३७ रुपैयाँ ३२ पैसा छ । यस्तै निष्क्रिय कर्जा अनुपात ०.९७, निक्षेप लागत ५.४९, सीसीडी ६८, आधारदर ७.३२ र स्प्रेडदर ३.७३ प्रतिशत रहेको बैंकले जनाएको छ ।
समीक्षा अवधिमा बैंकले १ खर्ब ९० अर्ब ८० करोड रुपैयाँ निक्षेप परिचालन गरी १ खर्ब ४८ अर्ब २३ करोड रुपैयाँ कर्जा प्रवाह गरेको छ । नबिलको सञ्चित कोषको आकार बढेर १२ अर्ब ६६ करोड रुपैयाँ पुगेको छ ।
वि.सं.२०७७ साउन २९ बिहीवार १०:५६ मा प्रकाशित
