काठमाडौं । प्रभु बैंकले गत आर्थिक वर्षमा १ अर्ब ३६ करोड रुपैयाँ खुदनाफा गरेको छ । अघिल्लो आर्थिक वर्षमा बैंकले १ अर्ब ७८ करोड रुपैयाँ नाफा गरेको थियो ।
गत आर्थिक वर्षमा गरेको नाफाबाट बैंकले सेयरधनीहरुलाई १ अर्ब ८ करोड रुपैयाँ लाभांश बाँड्न सक्ने छ । कोरोना माहामारीका कारण बैंकको नाफामा गिरावट आएको छ ।
बैंकले गत आर्थिक वर्षमा खुदब्याज, कमिशन तथा शुल्क गरी ५ अर्ब ४६ करोड रुपैयाँ आम्दानी गरेको थियो । अघिल्लो वर्षको सोही अवधिमा प्रभुले ५ अर्ब १८ करोड रुपैयाँ आम्दानी गरेको थियो ।
बैंकको निष्क्रिय कर्जा २.८१, निक्षेप लागत ६, सीसीडी रेसियो ६६.९६, आधारदर ८.३२ र स्प्रेडदर ३.५७ प्रतिशत रहेको बैंकले जानकारी दिएको छ । बैंकको प्रतिसेयर आम्दानी १३ रुपैयाँ ९३ पैसा छ ।
गत वर्ष बैंकको निक्षेप परिचालन बढेको छ । असारसम्म बैंकले १ खर्ब २८ अर्ब ४९ करोड रुपैयाँ निक्षेप परिचालन गरी ९९ अर्ब ६९ करोड रुपैयाँ कर्जा प्रवाह गरेको छ । बैंकसंग प्रसस्त लगानीयोग्य पुँजी रहेको छ ।
अघिल्लो वर्षको सोही अवधिमा बैंकको निक्षेप १ खर्ब ५ अर्ब ४८ करोड रुपैयाँ थियो । एक वर्षको बीचमा प्रभुले २३ अर्ब रुपैयाँ बढी निक्षेप संकलन गरेको छ । अघिल्लो वर्ष बैंकले ८५ अर्ब ८२ करोड रुपैयाँ कर्जा प्रवाह गरेको थियो ।
बैंकको सञ्चित कोषको आकार बढेर ४ अर्ब १८ करोड रुपैयाँ पुगेको छ । अघिल्लो वर्ष सञ्चित कोषमा ३ अर्ब ९० करोड रुपैयाँ थियो । प्रभुको चुक्तापुँजी १० अर्ब ३१ करोड ५५ लाख रुपैयाँ छ ।
वि.सं.२०७७ साउन ३१ शनिवार ०९:११ मा प्रकाशित