काठमाडौं । आर्थिक वर्ष २०७६/७७ मा विप्रेषण (रेमिट्यान्स) आप्रवाहमा ०.५ प्रतिशतले घटेको छ । एक वर्षको अन्तरालमा मुलुकभित्र कूल ८ खर्ब ७५ अर्ब ३ करोड रुपैयाँ रेमिट्यान्स भित्रिएको छ ।
नेपाल राष्ट्र बैंकले सोमबार वार्षिक वित्तीय विवरण सार्वजनिक गर्दै रेमिट्यान्स घटेको जनाएको हो । राष्ट्र बैंककाअनुसार अघिल्लो वर्ष रेमिट्यान्स १६.५ प्रतिशतले बढेको थियो ।
अमेरिकी डलरमा रेमिट्यान्स ३.३ प्रतिशतले घटेको छ । अघिल्लो वर्ष यस्तो आप्रवाह ७.८ प्रतिशतले बढेको थियो । यस अवधिमा वैदेशिक रोजगारीका लागि अन्तिम श्रम स्वीकृति (संस्थागत तथा व्यक्तिगत–नयाँ र वैधानिकीकरण) लिने नेपालीको संख्या २०.५ प्रतिशतले घटेको छ ।
अघिल्लो वर्ष यस्तो संख्या ३२.६ प्रतिशतले घटेको थियो । वैदेशिक रोजगारीका लागि पुनः श्रम स्वीकृति लिने नेपालीको संख्या ३४.७ प्रतिशतले घटेको छ । अघिल्लो वर्ष यस्तो संख्या ५.४ प्रतिशतले बढेको थियो । रेमिट्यान्स वैदेशिक रोजगारीमा जाने कामदारमा भर पर्छ । वैदेशिक रोजगारीमा जाने कामदारको संख्या घटेसँगै रेमिट्यान्समा धक्का लागेको हो ।
त्यस्तै, खुद ट्रान्सफर आयमा १.३ प्रतिशतले कमी आई ९ खर्ब ८२ अर्ब २२ करोड कायम भएको छ । अघिल्लो वर्ष यस्तो आय १५.० प्रतिशतले बढेको थियो ।
वि.सं.२०७७ भदौ ८ सोमवार १७:५१ मा प्रकाशित
