रौतहट । रौतहट जिल्लामा जारी निषेधाज्ञा एक साता थप भएको छ । समुदायमा संक्रमण देखिएको भन्दै स्थानीय प्रशासनले आज(सोमवार) देखि भदौ २१ गतेसम्म निषेधाज्ञा थप गरेको छ ।
जिल्ला प्रशासनले थप गरेको निषेधाज्ञा अवधिभर बैंक तथा वित्तीय संस्था खोल्न समय तोकिदिएको छ । थप गरिएको निषेधाज्ञा अवधिभर प्रत्येक दिन बिहान ७ बजेदेखि १२ बजेसम्म बैंक तथा वित्तीय संस्था खोल्न समय तोकिदिएको हो ।
यसअघि निषेधाज्ञा अवधिमा पनि जिल्लामा रहेका बैंक तथा वित्तीय संस्था खुल्दा सेवाग्राहिको चहलपहल बढेको थियो । खाद्यान्न तथा निर्माण सामग्रीका पसल खोल्न दिएको र उपभोग्य खाद्यान्न सामग्रीको आपूर्तिलाई सहज गरिएका कारण जिल्लाका बजारहरुमा चहलपहल भने देखिएको छ ।
प्रमुख जिल्ला अधिकारी इन्द्रदेव यादवका अनुसार अझैपनि जिल्लामा कोरोना संक्रमितहरुको संख्या बढ्दै गइरहेको र संक्रमणको जोखिमको सम्भावना उच्च रहेकोले निषेधाज्ञाको अवधि थप गरिएको हो ।
वि.सं.२०७७ भदौ १५ सोमवार १६:३० मा प्रकाशित