काठमाडौं । काठमाडौं उपत्यकाका ३ वटै जिल्ला प्रशासन कार्यालयले फेरि १ हप्ता निषेधाज्ञा थप गर्ने तयारी गरेका छन् । कोरोना संक्रमणको जोखिम कम नभएको निष्कर्षसहित फेरि १ हप्ता निषेधाज्ञा थप गर्ने विषयमा मंगलवार काठमाडौं, भक्तपुर र ललितपुरका प्रमुख जिल्ला अधिकारीबीच छलफल भएको हो ।
काठमाडौंका प्रमुख जिल्ला अधिकारी जनकराज दाहाल, ललितपुरका नारायणप्रसाद भट्ट र भक्तपुरकी हुमकला पाण्डेबीच भएको भर्चुअल बैठकमा निषेधाज्ञाको मोडालिटी भने केही परिवर्तन गर्ने विषयमा छलफल भएको छ ।
‘यसपटक अत्यावश्यकसँगै थप केही क्षेत्रलाई खुकुलो बनाउने गरी निषेधाज्ञा थप्नेतर्फ छलफल भएको छ । मोडालिटी तय गरेपछि बुधवार थप निर्णय हुन्छ,’ जिल्ला प्रशासन कार्यालय काठमाडौंका एक अधिकारीले भने ।
पछिल्लो पटक १० भदौमा थपिएको निषेधाज्ञाको समय बुधवार मध्यरातिबाट सकिँदैछ । होम डेलिभरी र टेकअवे सेवालाई खुला गरिने विषयमा समेत छलफल भएको छ भने निर्माणजन्य कामलाई खुला गरिने सम्भावना छ ।
सो विषयमा तीनै जिल्लाका प्रमुख जिल्ला अधिकारीहरूले बुधवार गृह मन्त्रालयका अधिकारीसँग छलफल गर्ने कार्यक्रम छ । गृहमा हुने छलफलपछि निर्णय हुनेछ ।
उपत्यकामा कोरोना संक्रमण बढेपछि गत ३ भदौदेखि निषेधाज्ञा जारी गरिएको थियो । शुरूमा १ हप्ताका लागि जारी गरिएको निषेधाज्ञा पछि पुनः १ हप्ता थप गरिएको थियो । पछिल्लो पटक १० भदौमा थपिएको निषेधाज्ञाको समय भदौ १७ गते मध्यरातिबाट सकिँदैछ ।
मंगलवार काठमाडौं उपत्यकामा थप ४८१ जनामा संक्रमण पुष्टि भएको थियो । त्यसमध्ये काठमाडौंका ३९३, ललितपुरका ५८ जना र भक्तपुरमा ३० जना छन् । राजधानी दैनिकमा खबर छ ।
वि.सं.२०७७ भदौ १७ बुधवार ०६:३५ मा प्रकाशित
