पाल्पा । समुदायस्तरमा कोरोना फैलिएपछि पाल्पाको तिनाउ गाउँपालिका कार्यालय एक हप्तासम्मका लागि बन्द गरिएको छ। नगरपालिका नजिक रहेको दोभानको मुख्य बजार पनि सिल गरिएको छ।
यही भदौ २८ गतेसम्म गाउँपालिकाको कार्यालयका सबै कामकाज ठप्प हुने गाउँपालिका अध्यक्ष ओमबहादुर घर्ती मगरले बताए। कार्यालय नजिकै रहेको बजारका स्थानीयलाई कोरोना पोजेटिभ देखिएको थियो।
एक जना होटल व्यवसायी महिलामा कोरोना पुष्टि भएपछि ट्रेसिङ गरेर १०७ जना स्थानीयको कन्ट्याक्ट स्वाब संकलन गरी पीसीआर परीक्षण गरिएको थियो। ती मध्ये ८ जनामा आइतबार कोरोना पुष्टि भएको छ।
आइतबार नै कार्यपालिकाको बैठक बसेर एक हप्ता दोभान बजार सिल गर्ने र कार्यालयका कामसमेत बन्द गर्ने निर्णय भएको छ। सिल गरिएको दोभान बजारका अन्य स्थानीयको समेत कन्ट्याक्ट ट्रेसिङ गरेर स्वाब संकलन गरी पीसीआर परीक्षण गर्ने तयारी भइरहेको अध्यक्ष घर्ती मगरले बताए।
यहाँ रहेका सरकारी तथा गैह्र सरकारी कार्यालय, बैंक तथा वित्तीय संस्था, बजार पसल, होटल तथा रेष्टुरेन्ट लगायत सबै एक हप्तासम्म बन्द रहने छन्। यहाँ मानिसलाई आवतजावत गर्न पनि रोक लगाइने छ। कोरोना पोजेटिभ देखिएकाहरुलाई गाउँपालिकाले निर्माण गरेको आइसोलेसनमा राखिएको उनले बताए।
वि.सं.२०७७ भदौ २२ सोमवार १३:३२ मा प्रकाशित
