काठमाडौं । सरकारले अब अवकाश प्राप्त सरकारी (निजामती, प्रहरी तथा जंगीलगायत) कर्मचारीको सेवा सुविधा भुक्तानी कोष तथा लेखा नियन्त्रक कार्यालय (कोलेनिका) बाट उपलब्ध गराउने भएको छ ।
यअअघि यस्तो भुक्तानी सम्बन्धित कार्यालयबाटै हुने गरेको थियो । चालु आर्थिक वर्ष २०७७–७८ बाट भने सेवाबाट अवकाश भएका सरकारी कर्मचारीको अवकाशपछिको भुक्तानी हुने उपदान, सञ्चित बिदा तथा औषधि उपचारतर्फको रकम कोष तथा लेखा नियन्त्रक कार्यालयहरुबाट हुने गरी अख्तियारी प्राप्त भएको उपमहालेखा नियन्त्रक भेषप्रसाद भुर्तेलले जानकारी दिए ।
खर्चमा एकरुपता ल्याउने तथा लेखा राख्न सहज हुने भन्दै यो वर्षबाट कोलेनिकाले यस्तो अख्तियारी पाएको हो । अर्को व्यवस्थाप नभएसम्म कोलेनिकाहरुबाटै अवकास प्राप्त कर्मचारीले अवकाशपछिको भुक्तानी लिनु पर्ने भएको छ ।
नेपालका सबै जिल्लामा कोष तथा लेखा नियन्त्रक कार्यालय स्थापना भएका छन् । अब सम्बन्धित कार्यालयका कार्यालय प्रमुख र लेखा प्रमुखले आवश्यक कागजात प्रमाणित गरेर कोलेनिकामा पत्र लिएर गएपछि मात्र कर्मचारीले भुक्तानी पाउने भएका छन् ।
वि.सं.२०७७ भदौ २२ सोमवार १३:३९ मा प्रकाशित