धनकुटा । कोरोना संक्रमणको अवस्था स्थिर रहेपछि धनकुटामा २६ दिनदेखि जारी निषेधाज्ञा हटाउने निर्णय भएको छ । जिल्ला संकट व्यवस्थापन केन्द्रको सोमबार बसेको बैठकले सिमामा कडाइ गर्दै आउँदो मंगलबारदेखि निषेधाज्ञा हटाउने निर्णय गरेको हो ।
बैठकले कोरोना भाइरसको भयाभह अवस्था रहेका जिल्लासँग जोडिएका नाकामा बाह्य आगमनलाई ठप्प पार्ने र सरकारले रोक लगाएका बाहेक व्यापार, व्यवसायलाई सुचारु गर्ने निर्णय गरेको सहाय प्रमुख जिल्ला अधिकारी भोजराज श्रेष्ठले जानकारी दिनुभयो ।
‘प्रत्यक्ष रुपमा तराईका जिल्लासँग जोडिएका ठाउँबाट आउने सवारी तथा सर्वसाधरणको आवागमनलाई ठप्प पार्ने र अन्य मापदण्डअनुसार खोल्ने निर्णय भएको श्रेष्ठका भनाई छ ।
बैठकले कोरोना प्रभावको सुरुदेखिको अवस्थालाई समीक्षा गर्दै जोखिम रहे पनि परिस्थिति केही सहज बन्दै गएकाले सर्वसाधारणको दैनिकीलाई सहज बनाउन सुचारु गर्ने निर्णय गरेको उहाँले बताउनुभयो ।
वि.सं.२०७७ भदौ २२ सोमवार २०:५७ मा प्रकाशित
