काठमाडौं । अन्ततः असोज १० गतेसम्म पुनः निषेधाज्ञा जारी रहने भएको छ ।
सिरहामा लगाइएको निषेधाज्ञा असोज १० गतेसम्मको लागि थपिएको छ । शनिबार राति १२ बजे सकिन लागेपछि निषेधाज्ञाको समयावधि पुनः बढाइएको सिरहाका प्रमुख जिल्ला अधिकारी प्रदिप राज कणेलले बताए।
जिल्लामा कोरोना संक्रमण बढ्दै गएपछि गत साउन ३२ गतेदेखि लगाइएको निषेधाज्ञालाई पुनः बढाइएको छ। असोज १० गते राति १२ बजेसम्मको लागि पुनः निषेधाज्ञा बढाइएको प्रजिअ कणेलले जानकारी दिए।
यस अवधिमा हाटबजार, मानिसहरुको भीड हुने सभा सम्मेलन, तालिम, गोष्ठि, पार्टी प्यालेस, मनोरञ्जन स्थल, शैलुन, ब्यूटिपार्लर, जिमखाना, प्रदर्शन, जात्रा, महोत्सवहरुमा रोक लगाइएको छ। यस अवधिमा मठ, मन्दिर, मस्जिद, गुम्बा, चर्च लगायतका धार्मिक तथा साँस्कृतिक स्थलहरुमा दैनिक नित्य पूजा, आराधना बाहेकका सबै गतिविधिमा रोक लगाइएको छ।
स्थानीय प्रशासनले यस निषेधाज्ञा अवधिमा अति आवश्यक कामका लागि निस्कँदा मास्कको अनिवार्य प्रयोग, भौतिक दूरी लगायतका मापदण्ड अपनाउन भनेको छ
सार्वजनिक तथा निजी सवारीको हकमा यात्रा गर्नुभन्दा पहिले अथवा यात्रा गरिसकेपछि डिसइन्फेक्ट गर्नुपर्ने, यात्रीलाई स्यानिटाइजरको प्रयोग गर्न लगाउने, निर्धारित भाडामा ५० प्रतिशतभन्दा बढी नलिन भनिएको छ।
स्थानीय प्रशासनले पसलको हकमा औषधि पसलहरुलाई नियमित संचालन गर्ने अनुमति दिएको छ भने खाद्यान्य, दुध, फलफूल, तरकारी, ग्यास, माछा, मासु वा अण्डाको जस्ता पसलहरु विहान ५ बजेदेखि अपराह्न ३ बजेसम्म र अन्य सामान विक्री गर्ने पसलहरु विहान ८ बजेदेखि अपराह्न ३ बजे सम्म सञ्चालन गर्न भनेको छ।
वि.सं.२०७७ भदौ २७ शनिवार १५:२७ मा प्रकाशित
