धनगढी । कैलालीका कैलारी गाउँपालिकाका सबै विद्यालय सञ्चालनमा आएका छन् । कोरोना महामारीले जारी लकडाउनका कारण बन्द भएका विद्यालय ५ महिनापछि सञ्चालनमा आएका हुन् ।
असोज १ गतेदेखि विद्यालय सञ्चालनमा आएपछि अध्ययनरत विद्यार्थी हर्षित भएका छन् । कक्षा ८ मा अध्ययरत छात्र सुशिल चौधरी कोरोना महामारीले जारी लकडाउनले विद्यालय बन्द भएपछि घरायसी काममा सक्रिय थिए ।
कहिले साथीहरु सँग खोलानामा माछा मार्ने त कहिले बस्तुभाउको लागि घाँसपात काट्ने काम गरेको बताउने उनी विद्यालय खुल्ने खबरले खुशी भएको बताउँछन् ।
कैलारी गाउँपालिकाले कोभिड १९ ले बन्द रहेको विद्यालय असोज १ गतेदेखि सञ्चालनमा ल्याउने निर्णय गरे सँगै त्यहाँस्थित विद्यालय सञ्चालनमा आएको हो । आवश्यक सुरक्षा अपनाएर विद्यालय सञ्चालनमा ल्याएको बताइएको छ । गाउँपालिकाले स्थानीय सरकार सञ्चालन ऐन २०७४ तथा विद्यार्थी सिकाइ सहजीकरण निर्देशिका २०७७ अनुसार वैकल्पिक शिक्षा प्रणाली अपनाई विद्यालय सञ्चालनमा ल्याएको बताएको छ ।
सरकारले वैकल्पिक प्रणालीबाट विद्यार्थी सिकाइ सहजीकरण निर्देशिका २०७७ जारी गरेको छ । जसको आधारमा विद्यालय सञ्चालन गर्न निर्देशन जारी गरिएको छ ।
निर्देशिका अनुसार वैकल्पिक शिक्षा प्रणाली अन्र्तगत शिक्षण सिकाइ केन्द्र स्थापना र रेडियो, टीभी तथा अनलाइनबाट कक्षा लिने विद्यार्थीको वर्गीकरण गरी पठनपाठन गरिने छ । तर जिल्लाको दुर्गम गाउँपालिकाको रुपमा चिनिने गाउँपालिकामा रेडियो, टेलिभिजन तथा अनलाइन प्रविधिको पहुँच नरहेकोले विद्याथीलाई विद्यालयमै बोलाउनुपर्ने अवस्था रहेको बताइएको छ ।
सरकारको निर्देशनपछि कैलालीका अन्य स्थानीय तहका विद्यालयहरु पनि वैकल्पिक प्रणालीमार्फत विद्यार्थी सिकाइ सहजीकरणको तयारीमा जुटेका छन् । कैलालीको धनगढी उपमहानगरपालिका लगायतका स्थानीय तहका विद्यालय पनि सञ्चालनको तयारीमा जुटेका छन् । असोज १६ गतेदेखि वैकल्पिक शिक्षा प्रणाली अपनाइ पठनपाठन सञ्चालन गर्ने जनाइएको छ ।
वि.सं.२०७७ असोज ७ बुधवार १४:२९ मा प्रकाशित