काठमाडौं । नेपाल टेलिकमले आगामी पुसभित्र मोबाइल ब्यालेन्सबाटै भुक्तानी गर्न मिल्ने सेवा सुरु गर्ने तयारी थालेको छ ।
मोबाइल मनी सेवा सुरु गर्न आवश्यक हार्डवेयर र सफ्टवेयर खरिदका लागि गरिएको ठेक्काको आर्थिक प्रस्ताव शुक्रबार खोलिएको टेलिकमका प्रबन्ध निर्देशक डिल्ली अधिकारीले जानकारी दिए ।
प्राविधिक मूल्यांकन सकिएपछि १० दिनभित्र ठेक्काको नतिजा सार्वजनिक गरिनेछ । ‘प्राविधिक मूल्यांकनपछि ठेक्का नतिजा आउँछ र सम्झौता भएको तीन महिनाभित्र काम गर्ने गरी सम्झौता गर्नेछौं,’ उनले भने, ‘पुसभित्र सेवा सुरु गर्ने योजना छ ।’ मोबाइलमा रहेको ब्यालेन्सबाटै भुक्तानी गर्न सकिने सेवा सुरु गर्न राष्ट्रिय वाणिज्य बैंक र टेलिकमले संयुक्त रूपमा छुट्टै कम्पनी स्थापना गरेका छन ।
मोबाइल मनी सेवा सुरु गर्न टेलिकमलाई नेपाल दूरसञ्चार प्राधिकरणले गत माघ १४ मा अनुमति दिएको थियो । त्यसलगत्तै माघ २५ मा एनसेललाई पनि प्राधिकरणले यस्तै खालको सेवा सुरु गर्न अनुमति दिएको थियो । कान्तिपुर दैनिकमा खबर प्रकाशित छ।
वि.सं.२०७७ असोज १२ सोमवार ०७:३४ मा प्रकाशित
