काठमाडौं । चाडबाडको खर्च जोहो गर्न पालेका खसीबोका बेच्न समस्या हुँदा किसान मर्कामा परेका छन् ।
उदयपुरको चौदण्डीगढी नगरपालिका १०, देवधारको कल्पना केसीले आफूले पालेका खसीबोका बिक्री नहुँदा दशैं कठिन हुन लागेको गुनासो गरिन् ।
जीविकोपार्जनको मुख्य पेसा नै बाख्रापालन बनाएकी उनलाई खसी बिक्री नभएपछि दशैं कसरी मनाउने चिन्ता परेको हो । उनी मात्र होइनन् वडा नम्बर ६ सातधारेका हर्कराज राउतलाई पनि त्यस्तै चिन्ताले सताएको छ ।
खसीबोका बिक्री गरेर आएको पैसाले दशैंमा छोराछोरीलाई नयाँ कपडा किन्ने मात्र हैन नुन, तेल, मरमसलालगायत अन्य दैनिक उपभोग्य वस्तुको बन्दोबस्त गर्नसमेत उनीहरूलाई आफ्नो उतिदन बिक्री नहुँदा आर्थिक अभाव परेको हो ।
यसवर्ष उदयपुरका अधिकांश बाख्रापालक किसानलाई खसिबोका बिक्री नहुँदा चाडबाड मनाउन ऋण काढ्नुपर्ने अवस्था आएको किसानको भनाइ छ । गोरखापत्र दैनिकमा भक्तिविलास पोखरेलले खबर लेखेका छन् ।
वि.सं.२०७७ असोज २६ सोमवार ०७:२६ मा प्रकाशित
