बैतडी । बैतडीको पाटन नगरपालिकाले लकडाउनमा कडाई गर्ने भएको छ ।
नगरपालिकाभित्र समुदाय स्तरमै कोरोना भाइरसका संक्रमित देखिन थालेपछि लकडाउनलाई कडाईका साथ लागु गर्ने निर्णय गरेको हो । नगरपालिकाका उपप्रमुख सरस्वती कोलीको अध्यक्षतामा बुधबार बसेको आकस्मिक सर्बपक्षिय बैठकले लकडाउन प्रभावकारि बनाउने निर्णय गरेको हो ।
बैठकले दशैं तिहारको समयमा गाउँघर र बजार क्षेत्रमा बढी भिडभाड हुनेहुदाँ सुरक्षाकर्मी र अनुगमनकर्ताको टोली खटाउने समेत निर्णय गरेको नगरपालिकाका प्रमुख प्रशासकिय अधिकृत नारायणदत्त पन्तले बताए । चाडपर्वको समयमा कोरोनाले भयावह रुप लिनसक्ने भन्दै यसबाट बच्ने उपाय अपनाउन सचेत गराउने उनले बताए ।
बजारमा भिडभाड कमगर्न नगरपालिका क्षेत्रभित्र भोलिदेखि बजार ब्यबसाय, होटेल, कार्यालय, संघसस्था, तालिम, गोष्ठी तथा सभा सम्मेलन र आवतजावत ५ दिन सम्म पुर्ण रुपमा बन्द गर्ने निर्णय गरेको गरिएको छ ।
यस्तै बैकं तथा बित्तिय संस्थाहरु कार्तिक १ देखि ३ दिनसम्मका लागि बन्द गर्ने निर्णय गरिएको नगरपािलकाले जनाएको छ । यसअघि नगरपालिकाका २ जना कर्मचारीका कोरोना देखिएपछि नगरपालिकाको कार्यालय र १० ओटै वडा कार्यालयहरु बन्द गरिएको थियो । पाटन नगरपालिकामा अहिलेसम्म देखिएका ६९ कोरोना संक्रमित मध्ये १९ जना अझै सक्रिय संक्रमीत रहेका छन् ।
यसअघि कोरोनाका संक्रमित समूदाय स्तरमै देखिन थालेपनि कुनै चासो नदेखाएको भन्दै नागरिक स्तरबाट पाटन नगरपालिका नेतृत्वको बिरोध भएको थियो ।
वि.सं.२०७७ असोज २८ बुधवार १३:४४ मा प्रकाशित
