ताप्लेजुङ । ताप्लेजुङको मैवाखोला गाउँपालिकाले आजबाट सबै विद्यालयमा पठनपाठन सुरु गरेको छ । विद्यालयमा कार्यरत शिक्षकले पोसाक नलगाई विद्यालय आए गाउँपालिकाले भत्ता रोक्का गर्ने भएको छ ।
लामो समय कोरोना भाइरसका कारणले विद्यार्थीको पठनपाठनमा प्रत्यक्ष असर परिरहेकाले आजदेखि औपचारिक विद्यालय खोल्ने निर्णय गरिएको गाउँलिकाका प्रवक्ता थुर्ककुमार चोङवाङले बताए । सबै विद्यालयमा स्वास्थ्य सामग्री गाउँपालिकाले नै उपलब्ध गराइदिने प्रवक्ता चोङवाङले बताए ।
कक्षा ८ देखि १२ सम्मका विद्यार्थीलाई बिहान कक्षा सञ्चालन हुने भएको छ । कक्षा ८ मुनिका विद्यार्थीलाई दिउँसो कक्षा सञ्चालन गर्ने निर्णय गरिएको प्रवक्ता चोङवाङले बताए । शिक्षकलाई तोकिएको पोसाक अनिवार्य लगाएर मात्र विद्यालय हाजिर हुनुपर्ने शिक्षा शाखाका प्राविधिक सहायक अर्जुनकुमार घिमिरेले जानकारी दिए ।
पोसाक लगाए–नलगाएको बारे छड्के अनुगमन गर्ने र तोकिएको पोसाक नलगाउने शिक्षकको पोसाक भत्ता कटौती गर्ने निर्णय गाउँपालिकाले गरेको घिमिरेले बताए ।
गाउँपालिकामा माध्यमिक विद्यालय पाँच, निम्नमाध्यमिक विद्यालय तीन, आधारभूत विद्यालय २० गरी जम्मा २८ सामुदायिक विद्यालय सञ्चालनमा रहेको शिक्षा शाखा प्रमुख कोम्देनले बताए ।
वि.सं.२०७७ मंसिर २१ आइतवार १८:२७ मा प्रकाशित
