बिश्व अधिकारी,मकवानपुर । जिल्ला समन्वय समिति (जिसस) मकवानपुरले जिससको मौजदात कोषको रकम जिल्लाका विभिन्न स्थानीय तहहरुमा निकासा गर्ने निर्णय गरेको छ ।
सोमबार बसेको जिससको ७१ औं बोर्ड बैठकले जिल्लाका सभाबाट पारित भए अनुसार जिल्लाका विभिन्न स्थानीय तहमा मौजदात कोष कार्यविधिले तोके अनुसारको योजना सञ्चालनका लागि रकम निकाशा गर्ने निर्णय गरेको हो ।
जिल्ला समन्वय समिति मकवानपुरका प्रमुख रघुनाथ खुलालको अध्यक्षतामा बसेको बैठकले स्थानीय तहहरुबाट माग भए अनुसारको रकम उपलब्ध गराउने निर्णय भएको हो ।
मौजादकोषबाट कोष सञ्चालन निर्देशिका बमोजिम गाउँपालिकासँगको लागत साझेदारीमा कार्य हुने गरि रकम उपलब्ध गराईने प्रमुख खुलालले बताउनुभयो ।
बैठकले जिल्लाको ईन्द्रसरोवर गाउँपालिकाको प्रशासनिक भवन निर्माणका लागि ५० लाख रुपैयाँ र हेटौंडा–९ को वडा कार्यालय भवन निर्माणका लागि ५० लाख रुपैया उपलब्ध गराउने निर्णय भएको प्रमुख खुलालले बताउनुभयो ।
यस्तै हेटौंडा–१३ स्थित महेन्द्र माविलाई १० लाख, हेटौंडा–२ स्थित सिद्धार्थ माविलाई १५ लाख, हेटौंडा–८ स्थित मदन आश्रृत स्मृति भवनका लागि १३ लाख रुपैयाँ उपलब्ध गराउने निर्णय उहाँले बताउनुभयो ।
बैठकमा विभिन्न समसामयिक विषयमा समेत छलफल भएको थियो । आजको बैठकमा जिसस उपप्रमुख भगवती पुडासैनी, सदस्यहरु देवराज रिमाल, गणेशकुमारी प्रधान, सिता अधिकारी, सरिता विक, चित्र बहादुर बलामी, बुद्धबहादुर स्याङ्तान, सानोकान्छी स्थाङ्तानलगायत कार्यालयका कर्मचारीहरुको उपस्थिती थियो ।
वि.सं.२०७७ मंसिर २२ सोमवार २०:३६ मा प्रकाशित
