चितवन । चितवन जिल्लामा यस आर्थिक वर्षको चार महिनामा ६५६ घरेलु तथा साना उद्योग दर्ता भएका छन् ।
घरेलु तथा साना उद्योग कार्यालय चितवनले दिएको जानकारीअनुसार यस आर्थिक वर्षको पहिलो चौमासिकमा दर्ता भएका ६५६ उद्योगमा रू. एक अर्ब ५५ करोड १६ लाख २८ हजार लगानी छ । गत वर्ष सोही अवधिमा दर्ता भएका ७५१ उद्योगमा रू. एक अर्ब ७४ करोड १० लाख ४३ हजार लगानी थियो ।
यी उद्योगमा एक हजार ९६२ ले रोगगारी पाएका छन् भने ३७२ पुरुष र ३३९ महिला गरी ७११ जना उद्यमी बनेका छन् । यद्यपि पहिलो चौमासिकमा गत वर्षभन्दा कम उद्योग खुलेका छन् ।
चितवनमा घरेलु उद्योग कम खुल्ने गरेको पाइएको छ । यस प्रथम चौमासिकको अवधिमा ४७४ साना उद्योग, १७८ लघुउद्यम र चार घरेलु उद्योग दर्ता भएका छन् ।
यस आवको साउनबाट कार्यालयमा लघु उद्योग दर्ता नहुने कार्यालयका सूचना अधिकारी सुदर्शन पौडेलले जानकारी दिए । अहिले लघु उद्योगको दर्ता स्थानीय तहमा नै हुने गरेको छ ।
पहिलो चौमासिकमा दर्ता भएका उद्योगमा कृषि तथा वनजन्यतर्फ मात्र ४७८ उद्योग दर्ता भएका छन् । यसतर्फ युवाहरुको बढी आकर्षण भएको पाइएको छ ।
यस्तै उत्पादनमूलकमा ६२, पर्यटनमूलकमा ६२, सेवामूलक ५४ उद्योग दर्ता भएका छन् । ऊर्जामूलक, निर्माणमूलक, विज्ञान तथा सूचना प्रविधिमूलक र खनिजजन्यमा कुनै उद्योग दर्ता भएका छैनन् । यस्तै चार महीनाको अवधिमा ७२४ उद्योग नवीकरण भएका छन् भने ५४ उद्योग बन्द भएका छन् । दर्ता भएको पाँच वर्षपछि पहिलोपटक नवीकरण गर्नुपर्छ भने त्यसपछि हरेक दुई–दुई वर्षमा नवीकरण गर्नुपर्ने पौडेल बताउँछन् । त्यस्तै चार महीनामा ९७ उद्योगले रू. २३ करोड ८० लाख ८९ हजार लगानी बढाएका छन् ।
चितवनमा हाल १३ हजार १४५ साना तथा घरेलु उद्योग सञ्चालित छन् । तीमध्ये १२ हजार ५९६ पुरुष र तीन हजार ४१७ महिला गरी १६ हजार १३ उद्यमी छन् भने ५५ हजार ४९८ जनाले रोजगारी पाएका छन् । ती उद्योगमा कुल रू. २४ अर्ब नौ करोड ११ लाख एक हजार लागानी रहेको छ ।
कृषि तथा वनजन्य उद्योगमा सबैभन्दा धेरै लगानी रहेको छ भने ऊर्जामूलक उद्योगमा सबैभन्दा कम लगानी छ । कार्यालयले रू. पाँच लाखदेखि रू. पाँच करोडसम्म स्थिर पूँजी भएका उद्योग दर्ता गर्दै आएको छ । त्योभन्दा माथि पूँजी भएका उद्योग हेटौँडा र काठमाडौंमा दर्ता हुने गर्छन् ।
वि.सं.२०७७ मंसिर २४ बुधवार १०:३३ मा प्रकाशित
