काठमाडौं । २६ ओटा वाणिज्य बैंकमध्ये १६ ओटा बाणिज्य बैंकले लाभांश वितरण गर्ने प्रस्ताव गरेका छन् । गत आवको मुनाफाबाट यसवर्ष शेयरधनीलाई लाभांश वितरण गर्ने प्रस्ताव गरेका हुन् ।
१६ ओटा बैंकमध्ये एनआईसी एशिया बैंक र सिटीजन्स बैंकले साधारण सभाबाट लाभांश वितरण गर्ने प्रस्ताव पारित गरेका छन् । एनआईसी एशियाले मंसिर २२ गते सम्पन्न वार्षिक साधारण सभाबाट १९ प्रतिशत बोनस शेयर र १ प्रतिशत नगद लाभांश वितरण गर्ने प्रस्ताव पारित गरेको छ ।
त्यसैगरी सिटीजन्स बैंक इन्टरनेशनलले मंसिर २० गते सम्पन्न वार्षिक साधारण सभाबाट ८ प्रतिशत बोनस शेयर र ३ प्रतिशत नगद लाभांश वितरण गर्ने प्रस्ताव पारित गरेको छ । त्यस्तै लाभांश पारित गर्नका लागि कुमारी बैंक र माछापुच्छ्र्रे बैंकले साधारण सभा आयोजना गरेका छन् ।
कुमारी बैंकले मंसिर २९ गते र माछापुच्छ्रे बैंकले पुस २ गते साधारण सभा आयोजना गरेका हुन् । कुमारी बैंकको लाभांश पाउनको लागि मंसिर १४ गतेसम्म कायम शेयरधनीले पाउनेछन् भने माछापुच्छ्रे बैंकको लाभांश असोज २१ गतेसम्म कायम शेयरधनीले पाउनेछन् ।
बाँकी अन्य बैंकहरुले साधारण सभाको मिति तय गर्न बाँकी रहेको छ । गत वर्षभन्दा यस वर्ष अधिकांश बैंकले नगदमा भन्दा बोनस शेयरमा जोड दिएका छन् ।
हालसम्ममा सबैभन्दा बढी बोनस शेयर १९ प्रतिशत एनआईसी एशिया बैंकले दिएको हो । त्यस्तै दोस्रोमा एनसीसी बैंकले १५ प्रतिशत बोनस शेयर वितरण गर्ने प्रस्ताव गरेको छ । १६ ओटा कम्पनीमध्ये सनराइज बैंक र प्रभु बैंक बाहेकका बैंकले गतवर्षभन्दा यसवर्ष बोनस शेयरमा जोड दिएका छन् ।
सनराइज बैंकको गतवर्षको तुलनामा यसवर्ष बोनस शेयर घटेको छ । गतवर्ष १० प्रतिशत बोनस शेयर वितरण गरेकोमा यसवर्ष कम्पनीले जम्मा ५ दशमलव ८ प्रतिशत बोनस शेयर वितरण गर्ने प्रस्ताव गरेको हो । त्यस्तै प्रभु बैंकले गत वर्ष १६ प्रतिशत बोनस शेयर दिएकोमा यसवर्ष १० प्रतिशत बोनस शेयर वितरण गर्ने प्रस्ताव गरेको छ । आर्थिक अभियानबाट
वि.सं.२०७७ मंसिर २४ बुधवार १०:३० मा प्रकाशित