काठमाडौं । बिहीबारदेखि नेपाल भारतबीच ऊर्जा सचिवस्तरीय संयुक्त बैठक भइरहेको छ । बैठक विद्युत् प्रसारण र वितरण प्रणालीमा केन्द्रित भएको बताइएको छ ।
आज सकिने बैठकमा ढल्केबर–मुजफ्फरपुर अन्तर्देशीय प्रसारण लाइन र बुटवल–गोरखपुर प्रसारण लाइनबारे छलफल भइरहेको छ । त्यस्तै लम्की–बरेली र इनरूवा–पूर्णिया ४०० किलोभोल्टको प्रसारण लाइनलाई पनि नेपालले प्राथमिकताका साथ उठाएको छ ।
बैठक कोरोना महामारीका कारण भर्चुअल माध्यमबाट भइरहेको छ। अघिल्लो बैठक भारतमा भएको थियो। ऊर्जा मन्त्रालयका सहसचिव प्रविणराज अर्यालका अनुसार ११ वटा प्रसारण लाइन र नयाँ पूर्वाधारका निर्माणका विषयमा छलफल केन्द्रित छ ।
बिहीबारको बैठकमा टनकपुरबाट ट्रान्सफर्मरको क्षमता बढाउन नेपालले प्रस्ताव गरेको थियो। दुवै देशको विद्युत् खपतका लागि ‘एक्सचेन्ज मार्केट’मा विषय पनि कुराकानी अगाडि बढेको अर्यालले जानकारी दिए । नेपाल विद्युत् प्राधिकरणका अनुसार हाल करिब १,३६० मेगावाट विद्युत उत्पादन भइरहेको छ ।
अबको केही महिनामा नयाँ आयोजना सम्पन्न हुने चरणमा पुगेकोले विद्युत् निर्यातको अवस्था आउन लागेको प्राधिकरणको आँकलन छ ।उच्च माग हुने साँझको समयमा बढीमा १,२८० मेगावाट विद्युत् खपत हुने प्राधिरणको भनाइ छ। तर हिउँदको समयमा नदीको वहाव घटेर उत्पादन घटेकोले अहिले भारतबाट आयात गर्नुपरेको प्राधिकरणले जनाएको छ ।
नेपालले हाल ढल्केबर–मुजफ्फरपुर प्रसारण लाइनमार्फत बढीमा ३५० मेगावाट विद्युत् आपूर्ति गरिरहेको छ ।
वि.सं.२०७७ मंसिर २६ शुक्रवार १०:५८ मा प्रकाशित