कञ्चनपुर । भीमदत्त नगरपालिकाले नेपाल रेडक्रस सोसाइटी जिल्ला शाखा कञ्चनपुरलाई रक्त सञ्चार सेवा केन्द्र(ब्लड बैंक) सञ्चालनका लागि यस सहयोग गरेको छ ।
स्थानीय तह निर्वाचनपछि भीमदत्त नगरपालिकाले रेडक्रसलाई ब्लड बैंक सञ्चालनका लागि बर्षेनी तीन लाख नगद सहयोग गर्दै आएको छ । नगरपालिकाले यस वर्ष पनि ब्लक बैंक सञ्चालनका लागि तीन लाख सहयोग गरेको छ ।
नगरपालिका कार्यालयमा कार्यक्रम गरी रेडक्रसलाई सहयोग रकम हस्तान्तरण गरिएको छ । कार्यक्रममा भीमदत्त नगरपालिकाका मेयर सुरेन्द्र विष्टले रेडक्रसका जिल्ला सभापति टेकराज उप्रेतीलाई तीन लाखको चेक हस्तान्तरण गरे ।
नगरपालिकाका जनप्रतिनिधि, कर्मचारी र रेडक्रसका पदाधिकारीहरु कार्यक्रममा सहभागी भएका छन् । चेक हस्तान्तरणपछि भीमदत्तका मेयर विष्टले साझेदारी र सहकार्य गरी नगरलाई समृद्ध बनाउने नीति अनुसार रेडक्रसको रक्त सञ्चार सेवा केन्द्र सञ्चालनका लागि सहयोग गरीएको बताउनु भएको छ ।
भीमदत्त नगरपालिकाको सातौ नगर सभाबाट यस वर्षका लागि ब्लड बैंक सञ्चालनका लागि बजेट विनियोजन गरिएको थियो । यस अघिका दुई वर्ष पनि नगर सभाबाट बजेट विनियोजन गरी रेडक्रसलाई हस्तान्तरण गरिएको थियो ।
रेडक्रसले कमजोर समुदायका वासिन्दालाई निःशुल्क रुपमा रगत उपलब्ध गराउन सबै स्थानीय तहसंगै सहयोगका लागि आग्रह गरेको थियो । रेडक्रसको आग्रह अनुसार भीमदत्त नगरले निरन्तर रुपमा तीन÷तीन लाख सहयोग गर्दै आएको हो ।
रेडक्रस सोसाइटीका जिल्ला सभापति उप्रेतीले भीमदत्तले बर्षेनी सहयोग गरी रगत किन्न नसक्ने वासिन्दालाई निःशुल्क रगत उपलब्ध गराउन सहज भएको बताए ।
कञ्चनपुरका सबै स्थानीय तहलाई आग्रह गरिए पनि सबै तहबाट सहयोग उपलब्ध हुन नसकेको सभापति उप्रेतीले बताए । रेडक्रसले रगतका लागि प्रति व्यक्ति सात सय ६० रुपैँया लिने गरेको छ ।
भीमदत्तको सहयोगपछि कमजोर अवस्थाका नगर वासिन्दाले निःशुल्क रुपमा रगत पाउने भएका छन् । कार्यक्रममा रेडक्रस सभापति उप्रेतीले भीमदत्तका मेयर विष्टले महाकाली अस्पतालको विकासका लागि गरेको सहयोग सराहनीय भएको उल्लेख गर्दै नगरपालिका सँग साझेदारी र सहकार्यलाई निरन्तरता दिइने बताए ।
भीमदत्त नगरपालिका र रेडक्रसबीच पूर्वाधार निर्माण, विपद् व्यवस्थापन, आय आयआर्जन, रक्त सञ्चार सेवा केन्द्र सञ्चालन लगायतमा साझेदारी भएको छ । भीमदत्त नगरपालिका १० श्रीलंका र खल्ला मुसेट्टीमा दुबैको साझेदारीमा पूर्वाधार निर्माणका कार्य गरिएका छन् ।
वि.सं.२०७७ पुस २ बिहीवार १५:५२ मा प्रकाशित