रुपन्देही । रुपन्देहीको तिलोत्तमा नगरपालिकामा भूमि सम्बन्धी समस्या समाधान आयोगको लगत सङ्कलन इकाई कार्यालय स्थापना गरिएको छ । आयोगसँग हालै भएको कार्य सम्झौता अनुसार तिलोत्तमाले लगत सङ्कलन इकाई स्थापना गरेको हो ।
इकाई कार्यालयको नगर प्रमुख वासुदेव घिमिरेले शुभारम्भ गर्नुभयो । तिलोत्तमा नगर स्तरीय भूमिहीन दलित, भूमिहीन सुकुम्वासी तथा अव्यवस्थित बसोबास लगत सङ्कलन एवं सहजीकरण समितिको पहिलो बैठकपछि इकाई स्थापना गरिएको हो ।
नगर प्रमुख, उपप्रमुख, प्रमुख प्रशासकीय अधिकृत एवं राजनीतिक दलका प्रमुख र सदस्यलगायत सहभागी समितिको बैठकले इकाईमा रहने प्राविधिक तथा अन्य १६ जना कर्मचारीहरूको व्यवस्थापन गर्ने लगायतका निर्णय गरेको प्रवक्ता सुरेन्द्र श्रीले जानकारी दिनुभयो ।
उहाँका अनुसार बैठकले अनुसूची २ बमोजिमको विवरण आयोगमा पठाउने, प्रशासनिक काम तत्काल मिलाउने र त्यसपश्चात् आयोगलाई सूचना प्रकाशित गर्न अनुरोध गर्ने लगायतका निर्णय समेत गरेको छ ।
सो अवसरमा नगर प्रमुख वासुदेव घिमिरेले नगरपालिकामा जनप्रतिनिधि आएसँगै भूमिहीन, सुकुम्वासी र अव्यवस्थित बसोबासीको समस्या समाधान गर्न अव्यवस्थित बसोबास तथा सार्वजनिक जग्गाको लगत सङ्कलन गर्नेलगायतका कामलाई प्राथमिकता दिइएको स्पष्ट पार्नुभयो ।
अब आयोगसँग भएको कार्य सम्झौता अनुसार भूमिहीन दलित, भूमिहीन सुकुम्वासी, अव्यवस्थित बसोबासीलाई जग्गाको मालिक बनाउने काम अघि बढ्ने उहाँले भनाइ छ । इकाई कार्यालयमार्फत आयोगले बनाएको फारमको ढाँचाअनुसार लगत सङ्कलन गरिने उहाँले बताउनुभयो ।
वि.सं.२०७७ पुस २३ बिहीवार १५:२४ मा प्रकाशित