काठमाडौं । शहरी विकास तथा भवन निर्माण विभागको महानिर्देशकमा नवराज प्याकुरेल नियुक्त हनुभएको छ । शहरी विकास मन्त्रालयले प्राविधिक सहसचिव प्याकुरेललाई विभागको महानिर्देशको जिम्मेवारी दिएको हो ।
नव नियुक्त महानिर्देशक प्याकुरेलले सोमवारबाट शहरी विकास तथा भवन विभागमा पदभार ग्रहण गर्नुभएको छ । मन्त्रालयअन्तर्गतको विभिन्न निकायमध्ये विभाग सबैभन्दा बढी जिम्मेवारी भएको र धेरै बजेट खर्च गर्ने निकाय भएकाले त्यहाँको महानिर्देशक पदलाई निकै आकर्षक पदका रुपमा हेर्ने गरिन्छ ।
मन्त्रालय अन्तर्गत रहेको विभाग सरकारी भवन तथा सघन शहरी विकासका साथै शहरी क्षेत्रको पूर्वाधार विकास गर्ने महत्वपूर्ण निकाय हो ।
नव नियुक्त महानिर्देशक प्याकुरेलले विभागअन्तर्गत भइरहेका कामलाई अझै प्रभावकारी रुपमा अघि बढाउने प्रतिवद्धता जनाउनुभएको छ ।
प्याकुरेलले हाल निर्माणाधीन अवस्थामा रहेका संघीय संसद भवन, मुख्यमन्त्री तथा प्रदेश प्रमुख निवास, प्रधानमन्त्री निवास, बञ्चरे डाँडास्थित ल्याण्डफिल साइड, गोदावरीको सभाहललगायत ठूला परियोजनालाई समयमै सम्पन्न गराउन मन्त्रालयसँग समन्वय गरेर अघि बढ्ने बताउनुभयो ।
नवनियुक्त महानिर्देशक प्याकुरेललाई बिल्डिङ एण्ड आर्किटेक समूहमा काबिल प्राविधिक सहसचिवका रुपमा हेर्ने गरिन्छ ।
वि.सं.२०७७ माघ ५ सोमवार १५:४९ मा प्रकाशित
