काठमाडौं । आईपीओ बाँडफाँड पछिको शेयर सूचीकरण गर्न चन्द्रागिरी हिल्स लिमिटेडले आगामी साता नेपाल स्टक एक्सचेन्ज (नेप्से)मा कागजात पेश गर्ने भएको छ ।
कम्पनीले सबै काजगात तयार गरेर आगामी साता नेप्सेसँग सूचीकरण सम्झौता गर्ने तयारी गरेको हो । चन्द्रागिरी हिल्सले गत शुक्रबार सर्वसाधारणलाई जारी गरेको १३ लाख ९६ हजार २२ कित्ता आइपीओ बाँडफाँट गरेको थियो ।
कम्पनीले पुस २४ गतेदेखि प्रतिकित्ता १०० रुपैयाँ अंकित मूल्यको १५ लाख ३४ हजार ११ कित्ता सेयर बिक्रीमा ल्याएकोमा ६१ हजार ३६४ कित्ता कर्मचारी र ७६ हजार ७०५ कित्ता सेयर सामूहिक लगानी कोषलाई छुट्टयाइएको थियो ।
यसैबीच चन्द्रागिरीले शेयर सूचीकरण सम्बन्धी कार्य गर्नका लागि ग्लोबल आईएमई क्यापिटललाई नियुक्त गरेको छ। आज बिहीबार ग्लोबल आइएमई क्यापिटलको केन्द्रीय कार्यालयमा भएको एक कार्यक्रममा चन्द्रागिरी हिल्स र ग्लोबल आईएमई क्यापिटलबीच सेयर रजिष्टारसम्बन्धी सम्झौता भएको हो।
सम्झौतापत्रमा चन्द्रागिरी हिल्सका तर्फबाट वित्त प्रमुख विष्णु गौतम र क्यापिटलका तर्फबाट सीईओ पारसमणि ढकालले हस्ताक्षर गरेका छन्। स्थानीय बासिन्दा र सर्वसाधारणमा शेयर जारी गरेको चन्द्रागिरी हिल्सले शेयरआवेदन गर्ने सबैलाई १ वर्षसम्म केबुलकारको टिकट यात्रामा २५ प्रतिशत छुट दिएको छ।
चन्द्रागिरी हिल्सको अधिकृत पूँजी २ अर्ब रुपैयाँ रहेको छ भने चुक्ता पुँजी १ अर्ब ५३ करोड ४० लाख ९१ हजार रहेको छ।
वि.सं.२०७७ माघ १५ बिहीवार १८:३३ मा प्रकाशित
