काठमाडौं । भोलि (फागुन २२ गते) शनिबार गण्डकी प्रदेशका पाँच जिल्लामा केही घण्टा विद्युत सेवा बन्द हुने भएको छ ।
नेपाल विद्युत प्राधिकरणले आज गोरखापत्रमा एक सूचना प्रकाशन गर्दै शनिबार बिहान १० बजेदेखि दिउँसो १ बजेसम्म कास्की, पर्वत, बागलुङ, म्याग्दी र मुस्ताङ जिल्लामा विद्युत सेवा बन्द हुने जानकारी गराएको छ ।
प्राधिकरणको पोखरा ग्रिड शाखाअन्तर्गत लेखनाथ सबस्टेसनमा १३२ केभी बसबार एक्सटेन्सन कार्यका लागि फागुन २२ गते केही समय विद्युत बन्द हुने प्राधिकरणले जनाएको छ ।
निर्धारित समयभन्दा अगावै काम सकिएमा सो समयभन्दा अगाडि नै विद्युत सेवा सुचारू हुने सूचनामा उल्लेख छ ।
वि.सं.२०७७ फागुन २१ शुक्रवार १४:५५ मा प्रकाशित
