काठमाडौं । काठमाडौं महानगरका प्रमुख विद्यासुन्दर शाक्यले कोरोना खोप केन्द्रहरुको अनुगमन गर्नुभएको छ । केन्द्रमा आउने जेष्ठ नागरिकका अनुभव सुन्न र केन्द्रको व्यवस्थापन हेर्न जनस्वास्थ्य विभागका अधिकारीसहित उहाँ अस्पतालहरुमा पुग्नु भएको हो ।
अस्पताल पुगेका मेयर शाक्यले ढुक्क भएर खोप लगाउन आग्रह गर्नुभएको छ । अनुगमनका क्रममा मेयर शाक्यले, जनस्वास्थ्य विभागलाई जेष्ठ नागरिकहरुलाई आराम गर्ने ठाउँ, इच्छा अनुसार तातो र चिसो पिउने पानीको व्यवस्था मिलाउन निर्देशन दिनुभयो । आवश्यकता अनुसार महिला स्वास्थ्य स्वयमसेविका, स्थानीय क्लब र संघ संस्थाका प्रतिनिधिलाई खटाउन उहाँको निर्देशन रहेको छ ।
फागुन २३ गतेबाट ६५ बर्ष उमेर समूह माथिका जेष्ठ नागरिकका लागि कोरोना विरुद्ध दोस्रो चरणको खोप कार्यक्रममा सुरु भएको छ ।
दोस्रो प्राथमिकतामा ५५ बर्षमाथिका जेष्ठ नागरिक, विद्यालयका प्राध्यापक, विद्यालय (सामुदायिक÷निजी) का शिक्षक कर्मचारी र सार्वजनिक यातायातका चालक, सहचालक परेका छन् । खोप लगाउन जाँदा नागरिकता, मतदाता परिचय पत्र, चालक अनुमति पत्र, कार्यालयको परिचय पत्र लिएर जानुपर्नेछ । परिचय पत्र उपलब्ध नहुनेका लागि शिफारिस आवश्यक पर्नेछ ।
काठमाडौं महानगरभित्रका खोप केन्द्रहरुमा शुक्रराज ट्रपिकल तथा सरुवा रोग अस्पताल, टेकुमा वडा नम्बर १२, १३, १४, २० र २१, वीर अस्पतालमा २२, २३, २४, २७ र २८ वडाका स्थानीयलाई खोप लगाइने छ ।
छत्रपाटी निःशुल्क चिकित्सालयमा १६, १७, १८, १९, २४ र २५, परोपकार स्त्री तथा प्रसुति रोग अस्पतालमा वडा १०, ११, २८ र २९, निजामति कर्मचारी अस्पतालमा वडा १०, ३१ र ३२ का स्थानीयलाई खोप लगाइने छ । यस्तै मदरल्याण्ड अस्पताल, सिनामंगल, पेप्सीकोलामा वडा नम्बर ३२ र ६ तथा काठमाडौं मेडिकल कलेज, सिनामंगलमा वडा नम्बर ९, ३० र ३१, ओम अस्पताल एण्ड रिसर्च सेन्टरमा वडा नम्बर ४, ५, ६, ७ र ८का स्थानीयलाई कोरोना विरुद्धको खोप लगाइने छ ।
स्तुपा अस्पताल, बौद्धमा वडा नम्बर ६, ७ र ८, सहिद गंगालाल राष्ट्रिय हृदय केन्द्रमा वडा नम्बर ३, ४ र ५, त्रि. वि. शिक्षण अस्पतालमा वडा नम्बर ३, ४ र ५, हिमाल अस्पताल, नक्साल वडा १, ५, २९ र ३०, नेपाल प्रहरी अस्पताल, महाराजगञ्ज २, १६ र २६, वीरेन्द्र सैनिक अस्पताल, छाउनीमा वडा नम्बर १३, १४, १५ र १९, जनमैत्री अस्पताल, बालाजुमा वडा नम्बर १६ र २६ का बासिन्दालाई कोरोना विरुद्धको खोप लगाइन्छ ।
वि.सं.२०७७ फागुन २५ मंगलवार १२:१० मा प्रकाशित
