काठमाडौं । धितोपत्र दलाल व्यवसायी (ब्रोकर कम्पनी)ले २ वर्षपछि उपत्यका बाहिरका शहरमा शाखा कार्यालय खोल्ने अनुमति पाएका छन् ।
करिब ३५ वटा ब्रोकरले २ वर्ष भन्दा अघि नै उपत्यका बाहिर शाखा कार्यालय खोल्न बोर्डमा अनुमति मागेका थिए । तर बोर्डले दुई वर्ष भन्दा लामो समयदेखि रोकेर राखेको अनुमति फागुन दोस्रो साताबाट दिन सुरु गरेको छ ।
बोर्डले विभिन्न ४ वटा ब्रोकर कम्पनीलाई उपत्यका बाहिरका ५ शहरमा शाखा कार्यालय खोल्न अनुमति दिएको हो । अनुमति पाउने ब्रोकरमा ३६ नम्बरको सेक्युर्ड सेक्युरिटिज, ३४ नम्बरको भिजन सेक्युरिटी र अन्य दुई रहेका छन् ।
बोर्डले झापाको दमक, चितवनको टाँडी, नवलपरासीको कावासोती, तनहुँको दमौली र म्याग्दी जिल्लाको वेनीमा नयाँ शाखा खोल्न फागुन दोस्रो साताबाट अनुमति दिन थालेको हो । उपत्यका बाहिर पनि दोस्रो बजारलाई थप विस्तार गर्ने क्रममा यी ५ स्थानमा शाखा खोल्नको लागि अनुमति दिएको बोर्डले जनाएको छ ।
स्टक ब्रोकर एसोशिएसनका अध्यक्ष सन्तोष मैनालीले ब्रोकरहरुले दुई वर्ष भन्दा अघिदेखि नै अनुमतिको लागि बोर्डमा आवेदन दिएपनि बल्ल अनुमति पाएको बताउनुभयो । बोर्डबाट स्वीकृती पाएसँगै शाखा नभएका स्थानमा जानको लागि ब्रोकरहरु तयार रहेका उहाँको भनाई छ । ब्रोकरले शाखा खोल्नको पहिलाको भन्दा अहिलेको मापदण्ड केही सहज भएका कारण ब्रोकरहरु थप आकर्षित हुन थालेका छन् ।
पहिला न्यूनतम एक हजार स्क्वाएर फिटको क्षेत्रफल चाहिनेमा अहिले ५ सयले पुग्ने मादण्डमा व्यवस्था गरिएको छ । यो लगायत अन्य कुराले पनि ब्रोकरलाई आकर्षित गरेको छ । अहिले दोस्रो बजारलाई प्रभावकारी रुपमा विस्तार आवश्यक भएको भन्दै सबै एकै ठाँउमा जान तयार हुनु भन्दा पनि नयाँ ठाँउमा शाखा खोल्नु पर्ने उहाँको तर्क छ ।
यी कम्पनीले बोर्डले तोकेको मापदण्ड पुरा गरेर पूर्वाधार तयार गरेपछि शाखाबाट दोस्रो बजारमा सेयर कारोबार गर्न योग्य हुनेछन् । यसको लागि पूर्वाधार तयार भएपछि धितोपत्र बोर्डले अनुगमन गरेर स्वीकृत दिनु पर्नेछ । लामो समयदेखि उपत्यका बाहिर ब्रोकरको शाखा खोल्न रोकेको बोर्डले गत महिनाबाट अनुमति दिन थालेपछि अब बैंकका सहायक कम्पनीलाई ब्रोकरको काम गर्न दिने विषयम ओझेलमा पर्ने देखिएको छ ।
बैंकक सहायक कम्पनीलाई ब्रोकरको काम गर्न दिँदा पनि जिल्ला जिल्लामा शाखा कार्यालय लैजानु पर्छ । बैंकका सहायक कम्पनीलाई अनुमति दिने अनी फेरी त्यसका सहायक कम्पनीलाई शाखा खोल्न अनुमति दिनु भन्दा भएका ब्रोकरलाई नै शाखा खोल्ने दिने तयारीमा बोर्ड लागेको छ ।
बोर्डले बैंकका सहायक कम्पनीलाई ब्रोकरको काम गर्न दिने विषयमा लामो समयदेखि मौन बस्नु र दुई वर्ष भन्दा लामो समयदेखि रोक्का रहेको ब्रोकरलाई शाखा खोल्ने अनुमति दिनुलाई शंकाको दृष्टिले हेर्न थालिएको छ । यतिबेला धितोपत्र बोर्ड पनि बैंकका सहायक कम्पनीलाई ब्रोकरको काम गर्न दिने विषयमा सकारात्मक हुन नचाहेको देखिएको छ । बोर्डले माथिल्लो निकाय (अर्थ मन्त्रालय)ले चासो दिए यो काम अघि बढाउने अन्यथा कुनै प्रकृया अघि नबढने तर्फ लागेको छ ।
वि.सं.२०७७ चैत ११ बुधवार १७:५९ मा प्रकाशित
