काठमाडौं । चालु आर्थिक वर्षको ८ महिनामा विप्रेषण आप्रवाह ८.६ प्रतिशतले वृद्धि भई ६ खर्ब ४२ अर्ब १४ करोड पुगेको छ । अघिल्लो वर्षको सोही अवधिमा विप्रेषण आप्रवाह १.५ प्रतिशतले बढेको थियो ।
अमेरिकी डलरमा विप्रेषण आप्रवाह ५.० प्रतिशतले वृद्धि भई ५ अर्ब ४५ करोड पुगेको छ । अघिल्लो वर्ष यस्तो आप्रवाह १.५ प्रतिशतले बढेको थियो । समीक्षा अवधिमा वैदेशिक रोजगारीका लागि अन्तिम श्रम स्वीकृति (संस्थागत तथा व्यक्तिगत–नयाँ र वैधानिकीकरण) लिने नेपालीको संख्या ७४.८ प्रतिशतले घटेको छ । अघिल्लो वर्षको सोही अवधिमा यस्तो संख्या २४.२ प्रतिशतले बढेको थियो । वैदेशिक रोजगारीका लागि पुनः श्रम स्वीकृति लिने नेपालीको संख्या समीक्षा अवधिमा ६५.२ प्रतिशतले घटेको छ । अघिल्लो वर्षको सोही अवधिमा यस्तो संख्या २.७ प्रतिशतले घटेको थियो ।
समीक्षा अवधिमा खुद ट्रान्सफर ७.२ प्रतिशतले वृद्धि भई ७ खर्ब १८ अर्ब ७० करोड पुगेको छ । अघिल्लो वर्षको सोही अवधिमा यस्तो ट्रान्सफर १.० प्रतिशतले बढेको थियो । यस्तै चालु आवको ७ महिनाको तुलनामा आठौ महिनामा विप्रेषण आप्रवाह घटेको छ । माघ महिनामा १०.९ प्रतिशतले बढेकोमा फागुन महिनामा ८.६ प्रतिशतले बढेको छ । माघको तुलनामा फागुमा विप्रेषण आप्रवाहमा २.३ प्रतिशतले घटेको नेपाल राष्ट्र बैंकले जनाएको छ ।
पछिल्लो समयमा कोरोना सहज बन्दै गएपछि आयात पनि बढन थालेको छ । जसले गर्दा हुन्डिको कारोबार समेत सुरु हुन थालेको छ । पैसा विस्तारै हुन्डितर्फ जान थालेपछि विप्रेषण आप्रवाहमा कमी हुन थालेको छ ।
वि.सं.२०७७ चैत ३० सोमवार १७:४८ मा प्रकाशित
