काठमाडौं । एक महिनाको अवधिमा गहना निर्यात ३७ प्रतिशतले बढेको छ । भन्सार विभागको तथ्याङक अनुसार फागुनको तुलनामा चैत महिनामा नेपालबाट सुनका गहना निर्यातमा बढोत्तरी देखिएको हो ।
चालु आर्थिक वर्षको नौ महिनामा २५ करोड ९५ लाख ८२ हजार रुपैयाँको गहना निर्यात भएको छ । फागुन मसान्तसम्ममा १८ करोड ९४ लाख ६४ हजार रुपैयाँ बराबरको सुनका गहना निर्यात भएको विभागले जनाएको छ । विभागका अनुसार चालु आवको सुरु देखि नै गहनाको निर्यात बढिरहेको छ ।
नेपालबाट अष्ट्रेलिया, हङकङ, अमेरिका लगायतका देशहरुमा सुनका गरगहनाको निर्यात हुने गरेकोे छ । विशेषगरी विदेशी मुलुकमा बन्न नसक्ने नेपाली मौलिक गर गहना नेपालबाट निर्यात हुने गर्दछ । विभागका अनुसार पछिल्लो समयमा नेपालीहरुको बसोबास बढी भएका मुलुकहरुमा गहना निर्यात हुने गरेको छ ।
निर्यात हुने मुलुकमध्ये पहिलोमा अमेरिका रहेको छ । विभागका अनुसार नौ महिनामा अमेरिकामा मात्रै १७ करोड ७९ लाख ७३ हजार रुपैयाँ बराबरको गहना निर्यात भएको छ ।
दोस्रोमा हङ्कङ् रहेको छ । हङकङमा ५ करोड १९ लाख ९७ हजार रुपैयाँ बराबरको गहना निर्यात भएको तथ्याङकमा उल्लेख छ । अष्ट्रेलियमा भने २ करोड ९६ लाख १२ हजार रुपैयाँ बराबरको सुनका गहना निर्यात भएको विभागले जनाएको छ ।
वि.सं.२०७८ वैशाख १२ आइतवार १२:१० मा प्रकाशित
