काठमाडौं । विश्वब्यापी रुपमा फैलिएको कोरोना महामारीले अर्थतन्त्रमा असर पारेपनि वाणिज्य बैंकहरुमा धेरै असर नपरेको देखिएको छ । बैंकहरुले प्रकाशित गरेको चालु आवको तेस्रो त्रैमासका वित्तीय अवस्थाले त्यस्तो देखाएको छ ।
चैत महिनाको अन्तिमसम्मा बैंकहरुले १३.७९ प्रशितले नाफा बढाएका छन् । गत आवको तेस्रो त्रैमासमा बैंकहरुको नाफा ४४ अर्ब ७० करोड ८८ लाख ७ हजार रुपैयाँ नाफा आर्जन गरेकोमा चालु आवको सोही अवधिमा बैंकहरुको नाफा १३.४९ प्रतिशतले बढेर ५० अर्ब ७४ करोड २५ लाख ६९ हजार रुपैयाँ पुगेको छ ।
बैंकहरुको वित्तीय अवस्थामा उल्लेख्य प्रगति देखिएको छ । कोरोना महामारीका कारण पनि बैंकहरुको नाफामा धेरै असर परेको छैन । लकडाउनको कारण अन्य क्षेत्रको अवस्था खस्कदै गएपनि बैंकहरुको नाफामा भने उल्लेख्य सुधार देखिएको छ ।
बैंकहरुले प्रकाशित गरेको वित्तीय अवस्था हेर्दा २७ वटा वाणिज्य बैंकमध्ये ६ वटाको नाफा घटेको छ भने अन्य बैैंकको नाफा धेरै नै बढेको छ । नाफा घट्नेमा एनसीसी बैंक, बैंक अफ काठमाण्डू, स्टयान्डर्ड चार्टर्ड, सेन्चुरी बैंक, एभेरेष्ट, हिमालयन र नेपाल एसबीआई बैंकको नाफामा भारी गिरावट आएको छ ।
यो अवधिमा सबैभन्दा बढी नाफा नबिल बैंकको रहेको छ । बैंकको नाफा ३ अर्ब ६७ करोड ९८ लाख ७० हजार रुपैयाँ रहेको छ भने दोस्रो र तेस्रोमा क्रमशः राष्ट्रिय वाणिज्य बैंक र ग्लोबल आईएमई बैंक रहेका छन् । सबैभन्दा कम नाफा आर्जन गर्ने बैंकमा सेञ्चुरी बैंक रहेको छ ।
बैंकको नाफा ३५ करोड ८१ लाख ५० हजार रुपैयाँ रहेको छ । यो बैंकको नाफा गत आवको सोही अवधिको तुलनामा ६०.८९ प्रतिशतले घटेको पनि छ । सिभिल, सेञ्चुरी र नेपाल एसबीआई बैंक बाहेकका सबै बैंकको नाफा अर्ब बढी रहेको छ । यी तीन बैंकको नाफा अर्ब भन्दा कम रहेको छ । प्रतिशतको आधारमा हेर्दा नाफामा छलाङ एनएमबी बैंकले मारेको छ । बैंकले नाफा ८७.७९ प्रतिशतले बढाएको छ ।
वि.सं.२०७८ वैशाख १५ बुधवार १२:४१ मा प्रकाशित
