काठमाडौं । हिउदको समयमा खोलामा पानीको बहाब कम हुँदा जलविद्युत कम्पनीले विद्युत बिक्री गरेर अपेक्षा अनुसार मुद्रा आर्जन गर्न असमर्थ भएका छन् ।
माघदेखि चैतसम्म सुख्खा मौसम हुने, खोलामा पानीको बहाब कम हुने र उत्पादन कम हुने भएको कारण कम्पनीहरुले विद्युत बिक्रीबाट गर्ने आम्दानी निकै कम हुने गरेको छ । यो बेला जलविद्युत कम्पनीले क्षमता अनुसार विद्युत उत्पादन गर्न सक्दैनन् । त्यसको असर प्राय हरेक आर्थिक वर्षको तेस्रो त्रैमासको वित्तीय अवस्थामा देखिने गरेको छ ।
विद्युत कम्पनीले जेठदेखि कात्तिक वा मंसिरसम्म पूर्ण क्षमतामा विद्युत उत्पादन गर्ने गर्दछन । त्यसपछि क्रमैसँग कम उत्पादन हुने गर्दछ । चैत सम्मको वित्तीय अवस्था प्रकाशति गरेका २५ वटा कम्पनीमध्ये १३ वटाको विद्युत बिक्रीबाट हुने आम्दानी घटेको छ भने बाँकी कम्पनीको बढेको छ ।
गत आर्थिक वर्षको तेस्रो त्रैमासमा ४ अर्ब ७४ करोड ४० लाख ९२ हजार रुपैयाँ विद्युत बिक्री गरेर आम्दानी गरेकामा चालु आवको सोही अवधिमा ७.२४ प्रतिशतले बढेर ५ अर्ब ८ करोड ७९ लाख ३७ हजार रुपैयाँ पुगेको छ ।
यो अवधिमा बिद्युत बिक्री गरेर सबैभन्दा बढी चिलिमे हाइड्रोपावरले ८० करोड ९२ लाख २५ हजार रुपैयाँको विद्युत बिक्री गरेको छ भने सानिमा माइ हाइड्रोले ६६ करोड ३६ लाख ४४ हजार रुपैयाँ, अरुण कावेली पावरले ५१ करोड ६९ लाख ३५ हजार रुपैयाँको विद्युत बिक्री गरेको छ । यो अवधिमा सबैभन्दा कम रैराङ हाईड्रोपावरले ६६ लाख ३९ हजार रुपैयाँको विद्युत बिक्री गरेको छ ।
प्रतिशतको आधारमा हेर्दा अरुण काबेलीको १३४.८४ प्रतिशतज्ञले बढेको छ । अन्य कम्पनीको भने सामान्य सुधार मात्रै देखिएको छ ।
यो अवधिमा ङादी ग्रुप, यूनाइटेड मोदी, पञ्चकन्या, अरुण भ्याली, बुटवल पावर, नेशनल, राधी, माउन्टेन, दिव्यश्वरी, पाँचथर, बरुण, आँखु खोला र छ्याङदी हाइड्रो पावरको विद्युत बिक्रीबाट हुने आम्दानी घटेको छ । कम्पनीहरुको विद्युत बिक्रीबाट हुने आम्दानी घट्दा त्यसको असर कम्पनीको नाफामा समेत पर्ने गरेको छ ।
वि.सं.२०७८ जेठ २ आइतवार १४:०९ मा प्रकाशित
