काठमाडौं । जेठ महिनामा आधा दर्जन कम्पनीले साधारणसभा गर्न भन्दै मिति तय गरेका छन् । साधारणसभा गर्न बाँकी विभिन्न ६ कम्पनीले जेठ मसान्तसम्मका लागि मिति तय गरेका हुन् ।
साधारणसभा गर्न जेठको लागि मिति तय गरेका कम्पनीमा अधिकांश इन्स्योरेन्स कम्पनी रहेका छन् । कोरोना महामारीका कारण भौतिक रुपमा उपस्थिति भएर सभा गर्न नसक्ने भएपछि केही कम्पनीले भुर्चअल माध्यमबाट सभा सम्पन्न गरेका छन् भने केहीले स्थगित समेत गरेका छन् ।
जेठ महिनामा साधारणसभा गर्न बाँकी रहेका ६ कम्पनीहरुमा सानिमा लाइफ इन्स्योरेन्स, नाडेप लघुवित्त वित्तीय संस्था, नेपाल सेवा लघुवित्त वित्तीय संस्था,हिमालयन जनरल इन्स्योरेन्स, लुम्बिनी जनरल इन्स्योरेन्स र सिद्धार्थ इन्स्योरेन्स रहेका छन् । आगमी जेठ २३ गते सानिमा लाइफले सभा गर्ने भएको छ । सभामा लेखा परीक्षकको नियुक्त र निजको पारिश्रमिक तोक्ने प्रस्ताव रहेको छ ।
सभा प्रयोजनका लागि कम्पनीले जेठ २३ गते बुक क्लोज गर्ने भएको छ । जेठ २४ गतेका दिन नेपाल सेवा लघुवित्तले सभा गर्ने भएको छ । सभामा लेखा परीक्षकको नियुक्त र निजको पारिश्रमिक तोक्ने र वीन लघुवित्त वित्तीय संस्थासंग गाभ्ने÷गाभिने मुख्य प्रस्ताव रहेको छ । सभा प्रयोजनका लागि कम्पनीले उक्त दिन बुक क्लोज गर्ने जनाएको छ ।
यस्तै, जेठ २८ गते तीन कम्पनीले साधारणसभा गर्दैछन् । हिमालयन, लुम्बिनी जनरल र सिद्धार्थ इन्स्योरेन्सले उक्त दिन सभा गर्ने मिति तय गरेका हुन् । यी मध्ये लुम्बिनी जनरलले भने भर्चुअल माध्यमबाट सभा गर्ने भएको हो ।
हिमालयन जनरलको आर्थिक वर्ष २०७६÷७७ को मुनाफाबाट ३ प्रतिशत बोनस सेयर र कर प्रयोजनका जागि ३.७५ प्रतिशत नगद लाभांश विवरण गर्ने प्रस्ताव रहेको छ । कम्पनीले सभा प्रयोजनका लागि जेठ १३ देखि २८ गतेसम्म बुक क्लोज गर्ने भएको छ ।
त्यसैगरि आव २०७६-७७ को मुनाफाबाट ५ प्रतिशत बोनस सेयर र कर प्रयोजनार्थ ५ प्रतिशत लाभांश पारित गर्न लुम्बिनी जनरलले सभा गर्ने भएको छ । कम्पनीले १६औँ सभा प्रयोजनका लागि जेठ १४ गते बुक क्लोज गर्ने भएको जनाएको छ ।
जेठ २८ गते नै सभाको मिति तय गरेको सिद्धार्थ इन्स्योरेन्सले पनि आव २०७६-७७ को मुनाफबाट १२ प्रतिशत बोनस सेयर र कर प्रयोजनार्थ ३.७८९४ प्रतिशत नगद लाभांश प्रस्ताव पारित गर्ने छ । सभा प्रयोजनका लागि कम्पनीले जेठ १४ गतेदेखि २८ गतेसम्म बुक क्लोज गर्ने भएको छ ।
वि.सं.२०७८ जेठ १२ बुधवार १४:०६ मा प्रकाशित
