काठमाडौं । चालु आर्थिक वर्षको १० महिनामा नेपालीले करिब ५७ करोड रुपैयाँ बराबरको चुइगम पडकाएका छन् । भन्सार विभागका अनुसार १० महिनाको अवधिमा ५६ करोड ९३ लाख ९९ हजार रुपैयाँ बराबरको चुइगम आयात भएको छ ।
विभागले सार्वजनिक गरेको बैशाख मसान्तसम्मको तथ्याङ्कले यस्तो देखाएको हो । उक्त अवधिमा १ हजार ७५५ टन चुइगम नेपाल भित्रिएको विभागले जनाएको छ ।
यो अवधिमा नेपालमा भारत, बंगलादेश, टर्की, कोरिया, अमेरिका लगायत विश्वका एक दर्जनबढी मुलुकहरुबाट चुइगम आयात भएको छ ।
चुइगम बैशाख मसान्तसम्म सबैभन्दा धेरै भारतबाट आयात भएको छ । भारतबाट पछिल्लो १० महिनामा ५५ करोड ६१ लाख ७ हजार रुपैयाँको १ हजार ७०८ टन चुइगम आयात भएको विभागले जनाएको छ ।
भारतपछि धेरै चुइगम बंगलादेशबाट आयात भएको छ । चालु आवको पछिल्लो १० महिनामा उक्त देशबाट ९९ लाख २८ हजार रुपैयाँ बराबरको ४१ हजार १७५ केजी चुइगम नेपाल आएको छ ।
त्यस्तै, टर्कीबाट १९ लाख १० हजार रुपैयाँको आयात भएको छ । वैशाख मसानतसम्म उक्त देशबाट ४ हजार ६९२ केजी चुइगम नेपाल आएको विभागले जनाएको छ ।
चालु आवको पछिल्लो १० महिनामा सबैभन्दा कम तीन देशबाट आयात भएको देखिएको छ । हङकङ, इटली र थाइल्याण्डबाट १÷१ हजार रुपैयाँ बराबरको चुइगम आयात भएको छ ।
कोरोनाले आर्थिक अवस्था खुम्चेको समयमा करिब ५७ करोड रुपैयाँ बराबरको चुइगम आयात हुनु भनेको बिना अर्थको खर्च हो । चुइगमनले मानिसको भोक, तिर्खा मेट्दैन ।
हेर्नुहोस् कुन देशबाट कति आयात ?
वि.सं.२०७८ जेठ १२ बुधवार १५:०१ मा प्रकाशित