काठमाडौं । नेपाल स्टक एक्सचेञ्ज (नेप्से)मा सूचीकृत १८ वटा निर्जीबन बीमा कम्पनी मध्ये अहिलेसम्म ११ वटा कम्पनीले मात्रै लाभांश घोषणा गरेका छन् र बाँकी कम्पनीले अहिलेसम्म आर्थिक वर्ष २०७६-७७ को मुनाफाबाट लगानीकर्तालाई दिने लाभांश घोषणा गरेका छैनन् ।
अन्य क्षेत्रका कम्पनीहरुले लाभांश घोषणा गरेर, साधारणसभाले पारित गरिसक्दा निर्जीबन बीमा कम्पनीले आर्थिक वर्ष सकिएको साढे १० महिना पुग्न लाग्दा पनि लाभांश घोषणा गरेका छैनन् ।
कानूनत आर्थिक वर्ष सुरु भएको ६ महिना भित्र कम्पनीले लाभांश घोषणा गरेर उक्त लाभाशलाई बीमा समितिले स्वीकृत दिएर कम्पनीले साधारणसभाले पारित गरिसक्नुपर्ने हो । तर कतिपय कम्पनीले साधारणसभा गनुपर्ने कानूनी समय सकिएको साढे ५ महिनासम्म लाभांश घोषणा गरेका छैनन् ।
बीमा समितिले कम्पनीहरुले नेपाल फाइनान्सियल रिपोर्टिङ स्टान्डर्ड (एनएफआरएस) प्रणाली अनुसार वित्तीय विवरण तयार गर्न समय लाग्ने भएकाले केही समयका लागि सहज गरेपनि त्यही सहजतालाई हतियार बनाएर कम्पनीहरुले साढे ५ महिनासम्म लगानीकर्तालाई अन्योल बनाइ राखेका छन् ।
अहिले कोरोना महामारीका कारण बीमा समितिमा कर्मचारी थोरै आउने र कम्पनीहरुले लाभांश स्वीकृतिका लागि ल्याएको प्रस्ताव स्विकृत गर्न कर्मचारी अभाव भएकोले पनि ढिला भएको केही कम्पनीहरुको भनाइ छ । अहिले केही कम्पनीहरुले त बीमा समितिका कारण साभारणसभा बोलाउन ढिलाइ भएको समेत बताउन थालेका छन् ।
अहिलेसम्म लाभांश घोषणा गरेका ११ वटा कम्पनीमा सबैभन्दा बढी शिखर इन्स्योरेन्सको रहेको छ । इन्स्योरेन्सले २७.२२ प्रतिशत बोनस र १.४६ नगदसहित २९.२३ प्रतिशत लाभांश घोषणा गरेको छ ।
दोस्रोमा सिद्धार्थ र तेस्रोमा सगरमाथा इन्स्योरेन्स रहेको छ । सिद्धार्थ र सगरमाथाले क्रमशः १५.७९ र ११.५८ प्रतिशत लाभांश दिने भएका छन् । सबैभन्दा कम हिमालयन जनरल इन्स्योरेन्सको ६.७५ प्रतिशत मात्रै रहेको छ । यता प्रिमियर इन्स्योरेन्सले भने गत वर्षको नाफाबाट लगानीकर्तालाई बोनस नदिइ नगद लाभांश मात्रै दिने भएको छ । कम्पनीले ११.०५ प्रतिशत नगद लाभांश दिने भएको छ ।
लाभांश घोषणा गरेका कम्पनीहरुका पनि बार्षिक सधारणसभा सकिएको छैन । केही कम्पनीले जेठमा साधारणसभा बोलाएका छन भने केहीले कोरोनालाई देखाएर सभा स्थगन समेत गरेका छन् ।
वि.सं.२०७८ जेठ १२ बुधवार १५:२२ मा प्रकाशित