काठमाडौं । सरकारले आगामी आर्थिक वर्ष २०७८-०८९ को बजेट आज (शनिबार) ४ बजे प्रधानमन्त्री तथा मन्त्रिपरिषदको कार्यालय सिंहदरबारको हलबाट प्रस्तुत गर्ने भएको छ ।
प्रधानमन्त्री केपी शर्मा ओलीको सिफारिसमा राष्ट्रपति विद्यादेवी भण्डारीले संसद विघटन गरेकाले आगामी आवको बजेट सरकारले अध्यादेशबाट ल्याउन लागेको हो ।
शनिबार ४ बजे अर्थ मन्त्री विष्णु प्रसाद पौडेलले प्रस्तुुत गर्ने बजेटमा निकै चासोको रुपमा बृद्ध भत्ता लगायत सामाजिक सुरक्षा भत्ता र कर्मचारीको तलब भत्तालाई लिइएको छ । प्रधानमन्त्री केपी शर्मा ओलीले यस अघि विभिन्न कार्यक्रममा बृद्ध भत्ता बढाउने र कर्मचारीको तलब बढाउने संकेत गर्नु भएको छ ।
कोरोनाको महामारीको समयमा ल्याउने बजेटमा बृद्ध भत्ता र कर्मचारीको तलब बढाउँदा त्यसको लागि आवश्यक स्रोत व्यवस्थापन गर्न समस्या भएको अर्थ मन्त्रालय स्रोतको दाबी छ । आगामी आवको बजेट विशेषगरी कोभिड–१९ ले पारेको असरलाई न्यूनिकरण, अर्थतन्त्रलाई पुनरुत्थान गर्नेगरी निर्माण गरिरहेको स्रोतको दाबी छ ।
प्रधानमन्त्रीले नै उदघोष गरेपछि उहाँले घोषणा गरेको बृद्ध भत्ता, सामाजिक सुरक्षा भत्ता केही बढाउने भएपनि कर्मचारीको तलबको विषयमा यकिन हुन नसकेको अर्थ स्रोतको भनाइ छ । यदि तलब बढेको खण्डमा बढीमा १५ प्रतिशतको हाराहारीमा बढने बताइएको छ । संसद विघटन भएका कारण यो पटक सरकारले अध्यादेशबाट बजेट ल्याउन लागेको हो ।
वि.सं.२०७८ जेठ १५ शनिवार ०७:५८ मा प्रकाशित
