काठमाडौं । नेपाल राष्ट्र बैंकका अनुसार बैंकहरुको औसत आधारदर घटेको छ ।
राष्ट्र बैंकका अनुसार वाणिज्य बैंकहरुको औसत आधार दर २०७७ जेठमा ८.६६ प्रतिशत रहेकोमा २०७८ जेठमा ६.६६ प्रतिशत कायम भएको छ ।
२०७८ जेठमा वाणिज्य बैंकहरुको निक्षेपको भारित औसत ब्याजदर ४.७२ प्रतिशत र कर्जाको भारित औसत ब्याजदर ८.४६ प्रतिशत रहेको छ । अघिल्लो वर्षको सोही महिनामा यस्ता दरहरु क्रमशः ६.१७ प्रतिशत र १०.४३ प्रतिशत रहेका थिए ।
राष्ट्र बैंकका अनुसार २०७७ जेठमा ९१–दिने ट्रेजरी बीलको भारित औसत ब्याजदर २.८१ प्रतिशत रहेकोमा २०७८ जेठमा ३.७९ प्रतिशत रहेको छ ।
वाणिज्य बैंकहरुबीचको अन्तर–बैंक कारोबारको भारित औसत ब्याजदर २०७७ जेठमा २.८० प्रतिशत रहेकोमा २०७८ जेठमा ३.२१ प्रतिशत रहेको छ । मौद्रिक नीतिको संचालन लक्ष्यको रुपमा लिइने औसत अन्तर–बैंक ब्याजदर २०७८ जेठमा ३.२४ प्रतिशत रहेको छ ।
राष्ट्र बैंकका अनुसार आर्थिक वर्ष २०७७-७८ को ११ महिनामा वाणिज्य बैंकहरुको १४ खर्ब २९ अर्ब १६ करोड र अन्य वित्तीय संस्थाहरु (वाणिज्य बैंकहरुबीच बाहेक) को १ खर्ब ८५ अर्ब १६ करोड गरी कुल १६ खर्ब १४ अर्ब ३२ करोडको अन्तर–बैंक कारोबार भएको छ ।
अघिल्लो वर्षको सोही अवधिमा वाणिज्य बैंकहरुको १४ खर्ब ६९ अर्ब ८१ करोड र अन्य वित्तीय संस्थाहरुको १ खर्ब २१ अर्ब ४२ करोड गरी १५ खर्ब ९१ अर्ब २३ करोड अन्तर बैंक कारोबार भएको थियो ।
वि.सं.२०७८ असार ३१ बिहीवार १२:४४ मा प्रकाशित
