काठमाडौं । गत आर्थिक वर्ष २०७७-०७८ को चौंथो त्रैमाससम्ममा सहकारी बैंकले १ अर्ब ६६ लाख ७४ हजार रुपैयाँ नाफा आर्जन गरेको छ ।
जुन गत आवको सोही अवधिको तुलनामा ४७.४१ प्रतिशतले बढी हो । अघिल्लो आवमा बैंकको नाफा ६८ करोड २८ लाख ८१ हजार रुपैयाँ रहेको थियो ।
बैंकका अनुसार गत आवको असार मसान्तसम्म खुद ब्याज आम्दानी र सञ्चालन मुनाफामा देखिएको सुधारले नाफा बढाउन सहयोग गरेको छ ।
अघिल्लो आवको असार मसान्तमा १ अर्ब १० करोड ७९ लाख १८ हजार रुपैयाँ खुद ब्याज आम्दानी गरेको बैंकले गत आवको सोही अवधिमा आईपुग्दा १ अर्ब ७४ करोड १८ लाख ३० हजार रुपैयाँ पुगेको छ । यस्तै सञ्चालन मुनाफा पनि ४४ करोड ६६ लाख ३४ हजार रुपैयाँबाट बढेर ६६ करोड ५० लाख ६३ हजार रुपैयाँ पुगेको छ ।
बैंकले प्रकाशित गरेको वित्तीय अवस्था अनुसार असार मसान्तसम्म २ अर्ब ८७ करोड ३२ लाख ७१ हजार रुपैयाँ सेयर पुँजी रहेको छ भने जगेडा कोषमा १ अर्ब ५२ करोड ३ लाख २६ हजार रुपैयाँ रहेको छ ।
अघिल्लो आवको असार मसान्तसम्म १४ अर्ब ८६ करोड १ लाख १५ हजार रुपैयाँ कर्जा लगानी गरेको बैंकले गत आवको सोही अवधिसम्म आईपुग्दा १९ अर्ब ७६ करोड १ लाख १५ हजार रुपैयाँ लगानी गरेको छ ।
बैंकको नाफामा उल्लेख्य वृद्धि देखिएपनि खराब कर्जा भने निकै बढेको छ । अघिल्लो आवको असार मसान्तमा ०.७० प्रतिशत रहेको खराब कर्जा अहिले ९८.५७ प्रतिशतले बढेर १.३९ प्रतिशत पुगेको छ ।
वि.सं.२०७८ साउन ८ शुक्रवार ११:१३ मा प्रकाशित
