काठमाडौं । चिलिमे जलविद्युत कम्पनीले गत आर्थिक वर्ष २०७७/७८ को चौथो त्रैमासको वित्तीय अवस्था सार्वजनिक गरेको छ ।
कम्पनीको वित्तीय अवस्था अनुसार गत आवमा नाफा घटेको छ । अघिल्लो आवको सोही तुलनामा कम्पनीको नाफा ६.३१ प्रतिशतले कमी देखिएको हो ।
अघिल्लो आवको चौथो त्रैमासमा ७४ करोड १६ लाख ६५ हजार रुपैयाँ नाफा कमाएको कम्पनीले गत वर्ष घटेर ६९ करोड ४८ लाख १६ हजार रुपैयामा झरेको छ ।
कम्पनीको विद्युत बिक्रीबाट हुने आम्दानीमा पनि कमी देखिएको छ । अघिल्लो आवमा १ अर्ब १४ करोड ७ लाख ३९ हजार रुपैयाँ आम्दानी गरेको कम्पनीले गत वर्षको आम्दानी भने १ अर्ब १२ करोड ८० लाख ५२ हजार रुपैयाँ गरेको छ ।
कम्पनीको चुक्तापुँजी ६ अर्ब २८ करोड ७ लाख ३९ हजार रुपैयाँ पुगेको छ । कम्पनीले जगेडा तथा कोषमा ३ अर्ब ८५ करोड ६५ लाख ८२ हजार रुपैयाँ राखेको छ ।
कम्पनीको प्रतिसेयर आम्दानी ११ रुपैयाँ १७ पैसा र प्रतिसेयर नेटवर्थ १६१ रुपैयाँ ४ पैसा रहेको छ ।
वि.सं.२०७८ साउन २५ सोमवार ११:४८ मा प्रकाशित