काठमाडौं । नेपाल टेलिकमले एफटीटीएच सेवा आक्रमक रुपमा विस्तार गरेको छ ।
टेलिकमले एउटै फाइबारबाट टेलिफोन, इन्टरनेट र टेलिभिजन सेवा उपलब्ध गराउन सकिने (एफटीटीएच) देशको ५४ जिल्ला पुर्याएको छ ।
टेलिकमले दिएको जानकारी अनुसार साउन २८ गते बिहीबारसम्म देशभरका १ लाख ७२ जना भन्दा बढी ग्राहकलाई उक्त सेवा वितरण गरिसकेको छ ।
२०७५ सालमा १ हजार ७३८ ग्राहकलाई मात्र यो सेवा उपलब्ध भएकोमा २०७६ मा ३० हजार ८७९ र २०७७ मा १ लाख ७ हजार ७०१ ग्राहकलाई उपलब्ध भएको थियो ।
यसैगरी गत बैशाख, जेठ, असार र साउनको २८ गतेसम्म अर्थात करिब ४ महिनाको अवधिमा ६४ हजार २९९ नयाँ लाइन वितरण गरिएको नेपाल टेलिकमा प्रवक्ता राजेश जोशीले जानकारी दिनुभयो । यस आर्थिक वर्षमा मुलुकभरका ६५ जिल्लामा एफटीटीएच सेवाको विस्तार गर्ने कम्पनीको योजना रहेको जोशीले बताउनुभयो ।
टेलिकमले एफटीटीएच सेवा अन्तर्गत मुख्यतः भ्वाइस र डाटा सेवा मात्र उपलब्ध गराइरहेकोमा गत २०७७ पुस १७ देखि एनटी टिभी ब्रान्डमा आईपी टिभी सेवा समेत उपलब्ध गराइरहेको छ ।
सुरुमा काठमाडौं उपत्यका र बनेपामा मात्र उपलब्ध गराइएको एनटी टिभी सेवा हाल भरतपुर, हेटौंडा, लाहान, टाँडी, धुलिखेल, नगरकोट, पोखरा, सौराहा, बुटबल, बर्दघाट, बागलुङ्ग, तौलिहवा, सन्धिखर्क, भैरहवा, पाल्पा, सिसुवा, तम्घास, दमौली, धादिङ, परासी, मंगलापुर र सिराहालगायत स्थानमा पनि विस्तार भइसकेको छ ।
उच्च गतिको भरपर्दो इन्टरनेट सेवाका लागि उपयोग भइरहेको एफटीटीएच सेवाले भ्वाइस टेलिफोनका लागि तामाको तारको विकल्पको रुपमा फाइबर उपलब्ध गरेको छ । सोही फाइबरबाट टेलिभिजन सेवा पनि उपलब्ध भए पश्चात ट्रिपल प्लेको अवधारणा कार्यान्वयन भएको टेलिकमले जनाएको छ ।
वि.सं.२०७८ साउन २९ शुक्रवार १३:०२ मा प्रकाशित