काठमाडौं । चालु आर्थिक वर्ष २०७८/७९ को साउन महिनामा ७९ लाख ७२ हजार रुपैयाँ बराबरको मह निर्यात भएको छ । भन्सार विभागले हालै सार्वजनिक गरेको तथ्याङ्कले यस्तो देखाएको हो ।
विभागका अनुसार चालु आवको पहिलो महिनामा ११ हजार ७९३ केजी प्रशोधित प्राकृतिक मह निर्यात भएको छ । नेपालबाट छिमेकी मुलुक भारत, अमेरिका, अष्ट्रेलिया, क्यानडा, कतार लगायतका मुलुकमा मह निर्यात हुने गरेको विभागले जनाएको छ ।
विभागका अनुसार सबैभन्दा बढी मह छिमेकी मुलुक भारतमा जाने गरेको छ । चालु आवको पहिलो महिनामा भारतमा ६९ लाख ३६ हजार रुपैयाँ बराबरको प्रशोधित प्राकृतिक मह निर्यात भएको हो । उक्त देशमा साउन महिनामा ११ हजार ११५ केजी मह नेपालबाट बाहिरिएको छ ।
यस्तै, अमेरिका ४ लाख ३४ हजार रुपैयाँ बराबरको ७७ केजी, अष्ट्रेलियामा ३ लाख ३३ हजार रुपैयाँ बराबरको ५६ केजी मह निर्यात भएको विभागले जनाएको छ ।
त्यसैगरि कतारमा १ लाख ५१ हजार रुपैयाँ ५१० केजी र क्यानडामा १ लाख १८ हजार रुपैयाँ बराबरको ३५ केजी प्रशोधित प्राकृतिक मह निर्यात भएको छ ।
मह हाम्रो शरीरको लागि बहुउपयोगी खाद्य वस्तु हो । महले मान्छेको स्मरण शक्ति तेज बनाउनुका साथै अनेक रोकको औषधीको रूपमा प्रयोग गर्न सकिन्छ ।
महलाई शक्तिप्रर्द्धक र रोग निरोधकको रूपमा प्रयोग गर्न सकिन्छ । बच्चाको वृद्धि विकासका लागि मह धेरै प्रभावकारी छ । अम्लपित्त, दम, रुघाखोकी, टन्सिल, आदिजस्ता विभिन्न समस्याका लागि मह उपयोगी हुन्छ ।
हाम्रो दैनिक जिवनामा आवश्यक कार्बोहाइड्रेट, प्रोटिन, भिटामिन बी र सी, आइरन, म्याग्नेसियम, क्याल्सियम, पोटासियम, फस्फोरस, सोडियमज जस्ता आवश्यक तत्त्व पाइन्छ त्यसेले पनि मह सेवन गर्नु आवश्यक मानिन्छ ।
वि.सं.२०७८ भदौ १७ बिहीवार १३:३८ मा प्रकाशित
