काठमाडौं । नेपाल समुद्रपार निकासी पैठारी संघले साना तथा मझौला निकासीकर्ताले पाउनुपर्ने निर्यात अनुदान लामो समयदेखि नपाएकोले यथाशीघ्र भुक्तानी गर्न आग्रह गरेको छ ।
संघले अर्थसचिव मधुकुमार मरासिनीलाई यस्तो आग्रह गरेको हो । संघले सचिव मरासिनीलाई व्यावसायमैत्री वातावरण निर्माणका लागि गर्नुपर्ने सुधारसम्बन्धी सुझाव दिएको छ ।
संघका अध्यक्ष सुनिलकुमार वंशलले सुझाव सचिव मरासिनीलाई हस्तान्तरण गर्नुभएको छ । सुुझावमा आयकर, मूल्य अभिवृद्धिकर, अन्तःशुल्क, भन्सार, आयात-निर्यात व्यापार क्षेत्रका समस्या र तिनका समाधानका उपाय समेटिएका छन् ।
भेटमा सन् २०२६ मा नेपाल विकासशील मुलुकमा स्तरोन्नति भएपछि अल्पविकसित मुलुकले पाउने सुविधाबाट वञ्चित हुने हुँदा विभिन्न मुलुकसँग द्विपक्षीय सम्झौता गरी निर्यातको लागि बजार सुनिश्चित गर्नुपर्ने, ट्रेडिङ हाउसलाई पनि पाँच वर्षका लागि एक्जिम कोड नवीकरण गर्ने सुविधा दिनुपर्ने लगायत सुझाव दिएको छ ।
उहाँले मिति सकिएका र ड्यामेज भएका वस्तु नष्ट गरको अनुगमन गरी प्रमाणित गर्ने निकाय हुनुपर्ने माग पनि अर्थसचिव मरासिनी समक्ष राख्नुभएको छ । त्यसैगरी, उन आयातमा रहेको सिन्डिकेट हटाउन पनि प्रतिनिधिमण्डलले माग गरेको छ ।
अर्थसचिव मरासिनीले संघको सुझाव ग्रहण गर्दै संघले उठाएका मुद्दाहरुलाई आफूले गम्भीर रुपमा लिने बताउनुभयो । उहाँले कोभिडका कारण आर्थिक गतिविधि प्रभावित नहोस् भनेर खोप खरिदलाई उच्च प्राथमिकता दिएको पनि सो अवसरमा जानकारी दिनुभयो ।
वि.सं.२०७८ भदौ २३ बुधवार १६:३८ मा प्रकाशित
