काठमाडौं । सेयर लगानीकर्ताले नेपाल राष्ट्र बैंकका गभर्नर महाप्रसाद अधिकारीको राजीनामा माग गर्दै आमरण अनसन सुरु गरेका छन् ।
पहिलो चरणमा भदौ २३ देखी २९ गतेसम्म दैनिक १ घन्टा माइतिघर मण्डलामा रिले अनसन बसेका लगानीकर्ताले आफ्नो माग पुरा नभएको भन्दै आज देखी नेपाल स्टक एक्सचेञ्ज (नेप्से) अगाडि आमरण अनसन सुरु गरेको त्यसको व्यवस्थापक दिपेन्द्र अग्रवालले बताउनुभयो ।
अग्रवालका अनुसार आजबाट लगानीकर्ता आदित्य शिवाकोटी आमरण अनसन बस्नु भएको हो । लगानीकर्ताले २३ गतेदेखी पुँजीबजार सुधार संघर्ष समितीको नाममा आन्दोलन गर्र्दै आएका थिए ।
यसअघि लगानीकर्ताले धितोपत्र बोर्डमा गएर छलफल गरेका थिए । बोर्ड लगानीकर्ताको मागमा सकारात्मक भएपनि अध्यक्ष नभएका कारण निष्कर्शमा पुग्न सकेको थिएन ।
त्यस्तै अर्थमन्त्रीलाई भेटेपनि लगानीकर्ताले राखेको गभर्नर राजीनामा लगायतमा माग पुरा हुन नसकेको हो । लगानीकर्ताले अनसन बस्ने भनेर धम्क्याउने र त्यसको लागि गभर्नरको राजीनामा हतियार बनाउने सोचका साथ गरेको आन्दोलन अहिले त्यही राजीनामा भन्ने शब्द नै गलपासो बन्ने चर्चा पनि सुरु भएको छ । संघर्ष समितिले यसअघि नै राष्ट्र बैंकका प्रवक्ता देवकुमार ढकाललाई भेटेर १८ बुँदे मागपत्र पेश गरेको छ ।
लगानीकर्ताले यसअघि राष्ट्र अगाडि नै आमरण अनसन बस्ने भनेर घोषणा गरेपनि अहिले नेप्से अगाडि टुकुचा खोलाको किनारमा अनसन सुरु गरेका हुन् ।
वि.सं.२०७८ भदौ ३१ बिहीवार १४:४२ मा प्रकाशित
