काठमाडौं । आज (आइतबार) संविधान दिवस तथा इन्द्रजात्रा परेका कारण सरकारले सार्वजनिक विदा दिएको छ । जसको कारण साताको पहिलो दिन आइतबारको सेयर बजार बन्द भएको छ ।
आइतबार सातौ संविधान दिवस पनि हो । साथै यही दिन इन्द्रजात्रा पनि परेको छ । जसका कारण नेपाल स्टक एक्सचेञ्ज (नेप्से) बन्द हुँदा सेयर कारोबार नहुने भएको हो । बिहीबार नेप्से सूचक ७६.६५ अंकले घटेर २८१२.२८ बिन्दुमा रोकिएको छ ।
आइतबार देशभर विभिन्न कार्यक्रमसहित सातौ संविधान दिवस मनाइँदैछ । विसं २०७२ असोज ३ गते संविधान जारी भएको दिनको स्मरणमा हरेक वर्ष संविधान दिवस मनाइँदै आएको छ ।
यसपटक सातौँ संविधान दिवस मनाउन लागिएको हो । सरकारको निर्णयानुसार असोज २–४ गते राष्ट्रिय दिवसका रूपमा नेपाल र विदेशस्थित नेपाली राजदूतावास र नियोगमा दीपावलीलगायत कार्यक्रम गरी मनाउन लागिएको छ ।
राष्ट्रिय दिवस मनाउन प्रधानमन्त्रीको अध्यक्षतामा मूल समारोह समिति गठन गरिएको छ । दिवसका अवसरमा आइतबार सैनिक मञ्च टुँडिखेलमा विशेष समारोह सम्पन्न भएको छ ।
वर्तमान सरकारले संविधानको कार्यान्वयनका लागि आवश्यक पर्ने कानुनी तथा नीतिगत विषयलाई सम्बोधन गरेको छ भने सङ्घीयताको कार्यान्वयनका लागि आवश्यक पहल र प्रयत्न गरिरहेको छ ।
जनताको आर्थिक, सामाजिक तथा सांस्कृतिक अधिकारसहित समाजवाद स्थापना गर्ने लक्ष्यसहित लेखिएको हाल कार्यान्वयमा रहेको नेपालको संविधान विगतको भन्दा विशिष्ट र फरक रहेको छ ।
वि.सं.२०७८ असोज ३ आइतवार १०:२० मा प्रकाशित