काठमाडौं । चालु आर्थिक वर्षको सुरुसँगै विप्रेषण आप्रवाह (रेम्यिान्स) घटेको छ । नेपाल राष्ट्र बैंकका अनुसार साउन महिनामा विप्रेषण आप्रवाह १८.१ प्रतिशतले घटेर ७५ अर्ब ९६ करोड कायम रहेको छ ।
अघिल्लो वर्षको सोही अवधिमा विप्रेषण आप्रवाह २३.० प्रतिशतले बढेको थियो । अमेरिकी डलरमा विप्रेषण आप्रवाह १७.५ प्रतिशतले कमी आई ६३ करोड ८२ लाख पुगेको छ । अघिल्लो वर्ष यस्तो आप्रवाह १४.५ प्रतिशतले बढेको थियो ।
यो अवधिमा वैदेशिक रोजगारीका लागि अन्तिम श्रम स्वीकृति (संस्थागत तथा व्यक्तिगत–नयाँ र वैधानिकीकरण) लिने नेपालीको संख्या उल्लेख्य रुपमा वृद्धि भई १३ हजार ८ सय पुगेको छ । अघिल्लो वर्षको सोही अवधिमा यस्तो संख्या ९९.२ प्रतिशतले घटेको थियो ।
त्यसैगरी, वैदेशिक रोजगारीका लागि पुनः श्रम स्वीकृति लिने नेपालीको संख्या समीक्षा अवधिमा २८६.१ प्रतिशतले वृद्धि भई ११ हजार ६२८ पुगेको छ । अघिल्लो वर्षको सोही अवधिमा यस्तो संख्या ८०.० प्रतिशतले घटेको थियो । समीक्षा अवधिमा खुद ट्रान्सफर १६.४ प्रतिशतले कमी आई ८५ अर्ब २१ करोड कायम भएको छ । अघिल्लो वर्षको सोही अवधिमा यस्तो ट्रान्सफर २० प्रतिशतले बढेको थियो ।
पछिल्लो समयमा वैदेशिक रोजगारीमा जाने नेपालीको संख्या बढेको छ भने विप्रेषण आउने क्रम घटेको छ । नेपालमा आउने विप्रेषण र हुन्डीको सम्बन्ध निकै देखिएको छ । हुन्डीको कारोबार मौलाएको समयमा बिप्रेषण घट्ने र यो कम हुँदा बढने गरेको छ । कोरोना महामारी न्यूनिकरण भएसँगै आयात निर्यात निकै बढेको छ । आयात निर्यात सुरुभएसँगै हुन्डीको कारोबार मौलाएको छ । जसको असर विप्रेषण आप्रवाह निकै घट्न थालेको छ ।
वि.सं.२०७८ असोज ७ बिहीवार १६:०७ मा प्रकाशित
